Komisioni Hetimor Parlamentar për shkarkimin e presidentit, kishte caktuar ditën e sotme si afatin e fundit për të zhvilluar një seancë dëgjimore me Metën. Por sot Komisioni është njohur me refuzimin e presidentit Meta për t’u paraqitur. Kjo ka shkaktuar edhe irritimin e socialistëve.
Përfaqësuesi i PS-së në Komisionin Hetimor, Spartak Braho, kërkoi që ai të sillet forcërisht në seancë. Madje Braho solli në kujtesë si Meta mori me dhunë Berishën kur ishte në rolin e kryeministrit. Duke folur në Komisionin Hetimor, deputeti Spartak Braho u shpreh se Meta duhet të thirret me dhunë, pasi sipas tij, nuk ka karakter, duke shtuar se akuzohet ndër të tjera për thirrje për dhunë.
“Nuk dua t’i heq asnjë presje shpjegimeve profesionale të znj. Bushka, ashtu është. Presidenti ka detyrimin që të sillet edhe me forcë, të gjejë mjetet, por është çështje e vullnetit, që do të thotë se ai s’ka vullnet, ç’është më kryesorja të njohë këtë Kuvend. Të njohë Komisionin Hetimor e jo më të paraqitet në bazë të kërkesave që bën Parlamenti. Megjithatë, unë do e shtroj çështjen ndryshe.
Ky president nuk ka karakter. Kjo është themelorja. Mua më kujtohen edhe ngjarjet e viteve të shkuara, ku ky president, në pozitën e kryeministrit në atë kohë, e mori me dhunë “Mister Debulesën”. Myslimit mund t’i kujtohet, sepse edhe Myslimi është ndër deputetët e vjetër.
Ashtu siç Berisha e ka marrë këtë me dhunë më 1994 në ngjarjet e Poliçanit. Tani unë vras mendjen. Ishin këta skenarë të lidhur ndërmjet tyre? Pse nuk vjen ky, sepse është i thirrur nga Komisioni Hetimor? Ky përveç të tjerave, akuzohet nga materialet që na janë servirur, për thirrje për dhe me dhunë, parashikuar nga neni 223 i Kodit Penal.
I mungon Komisionit Hetimor, vullneti për ta thirrur? Jam dakord me shpjegimet që dha znj Bushka, por ne duhet të shfaqim vullnetin tonë. Ai duhet thirrur me dhunë nesër. Kështu, që ta votojmë këtë propozim, ky është mendimi im”, deklaroi Braho.
Nga ana tjetër, Sekretarja e Komisionit Hetimor për Metën, Klotilda Bushka, tha se Kuvendi është legjitim dhe se kreu i shtetit mund të merret me forcë.
“Jemi legjitimë dhe na duhet të përmendim këtu edhe disa fakte të tjera. Të gjitha pretendimet për të mos njohur këtë Kuvend, rrëzohen nga Komisioni i Venecias. Mund të merret dhe me forcë. Në këtë fazë jemi tani, unë çmoj që nuk ka vullnet nga ana e presidentit për tu dëgjuar në këtë Komision”.
