Kryetari i Partisë së Lirisë, Ilir Meta, zbuloi në një konferencë për shtyp se do të padisë më 1 shtator Autoritetin e Dosjeve. Ai hodhi një lumë akuzash mbi kryeministrin Rama, se ka urdhëruar falsifikimin e dosjes gjatë kohës kur ai ishte President i Republikës.
“Juristët e mi po punojnë. Jam njohur me dosjen, nuk ekziston dhe s’mund të ekzistojë për Ilir Rexhep Metaj dhe kot lodhen dhe bëjnë qesharakë edhe institucionet shtetërore.
U’a kam treguar edhe origjinën që nga çerdhja deri te Pazari i Ri. Do të njiheni edhe ju si media të gjitha kur të bëhet kallëzimi penal.
Edhe Rama do të ketë një akuzë të rëndë, se ka urdhëruar falsifikim të dosjes të një qytetari. Pse e ka bërë ai? Unë e di shumë mirë!
Të jeni të sigurt se I.M., do të dalë spiuni ambulat Tao Tao, një kameleon gjithmonë në shërbim të atij që i ofron një tender, një mundësi më të mirë për të jetuar. Por absolutisht të jeni të sigurt që ky rast i Autoritetit të Dosjeve do të jetë ekzemplar”, tha Meta.
Meta u shpreh se e sheh Ramën të rënë, dhe se do t’i kthejnë fuqinë popullit shqiptar nëpërmjet referendumit.
“Edi Rama ka tmerr sepse nuk e blen dot më opozitën. Do të jetë një rast skandaloz të përdorimit të metodave më të ndyra të ish Sigurimit të Shtetit.
Edi Rama ka rënë, unë e shikoj të rënë, është shumë rëndë. Pas rënies së Edi Ramës, qëllimi t’i kthejmë fuqinë popullit shqiptar. Rikthimi i fuqisë përmes referendumit”, përfundoi ai.
