Presidenti i zgjedhur, Ilir Meta, në mitingun e Lëvizjes Socialiste për Integrim në qytetin e Gjirokastrës, tha se Rama ishte ai që largoi drogën nga Lazarati por më pas e mbushi të gjithë Shqipërinë me drogë. Meta e krahasoi Ramën me një fotokopje të Berishës së parë fare. Meta gjithashtu u tërhoq nga deklaratat për Greqinë por nuk u përgjigj akuzave te Ramës, ai tha se për pesë vitet e ardhshme që ai do të jetë President do të ketë marrëdhënie të shkëlqyera me vendin fqinj.
“Gjirokastra provoi hipokrizinë e Rilindjes, largoi drogën nga Lazarati por më pas e mbushi të gjithë Shqipërinë me drogë. PS bën takime nëpër cepa ne Gjirokastër që të duket sikur janë shumë dhe nuk e bëjnë mitingun në sheshin e ‘Çerçizit’,” tha Meta.
“Fuqia e Rilindjes qëndron te arroganca që vjen nga pushteti dhe përbuzja e njerëzve të thjeshtë.
Rilindja e pseudo socialistëve. Rama është fotokopje e Berishës së parë fare. Poshtërimin që po ju bëjnë njerëzve të ndershëm në administratë do të paguajnë me votën. Të gjithë ata që janë për tu kthyer sërish në administratë. Kjo që po ndodh është pranvera demokratike e Shqipërisë”, tha presidenti i zgjedhur Meta.
Gjithashtu Meta tha se “Marrëdhëniet tona me Greqinë do të jenë të shkëlqyera për pesë vitet e ardhme”. Por Meta nuk përsëriti më deklaratat e mëparshme duke akuzuar Kryeministrin për marrëdhënie të këqija me fqinjët.
