Presidenti i zgjedhur, Ilir Meta, në emisionin “Debati”, ka bërë akuza të forta ndaj kryeministrit Edi Rama duke e akuzuar atë se ka manipuluar ndërkombëtarët në lidhje me reformën në drejtësi. Meta tha gjithashtu se Rama ka pasur në plan të shpërbënte PD-në.
“Problemi i zotit Rama është se nuk e di çfarë kërkon dhe se çfarë do të bëjë në këtë vend. Të jesh kryeministër s’do të thotë të jesh pronar i vendit dhe të bësh ç’të duash me institucionet, demokracinë dhe votën e qytetarëve. Kjo është një marrëzi se s’është projekt, vizion. Qëndrimi i LSI në dy momente kyçe ishte reforma në drejtësi. Rama donte të bënte pa opozitën, kapjen e plotë të sistemit të drejtësisë, arriti të manipulonte dhe shumë ndërkombëtarë, por dështoi.Synonte edhe shpërbërjen e opozitës në parlament. Shumë deputetë ishin përpunuar do te votonin për reformën në drejtësi dhe për ta shpërbërë PD. Natyrisht unë s’e bëra për PD, por për hir të demokracisë në vend dhe në rast se kjo do te ndodhte, Shqipëria do kishte hyrë në krizë dhe do kishim pas probleme të jashtëzakonshme me procesin e integrimit evropian. Ai vetë donte zgjedhje pa opozitën, pavarësisht se opozita kishte qëndrimin e saj ekstrem për zgjedhjet, ai i provokonte në mënyrë të vazhdueshme se nuk donte zgjedhje me opozitën. Pasi dështoi skenari i Ramës për të bërë zgjedhje pa opozitën, i bëri ftesë kreut te opozitës, kanë bërë marrëveshje për të zgjidhur hallet e tyre e jo për të kontribuar për standarde më të larta të çështjeve të interesit të shqiptarëve. Kjo marrëveshje duhet të bëhej në tryezën e partive qe e thirren dhe duhet të ishte transparente, s’duhet të cënonte as kushtetutën, as kodin zgjedhor, as mundësinë e koalicioneve. Kjo marrëveshje ishte me idenë për të luftuar partitë e tjera, përveç LSI që nuk dëmtohet nga kjo”, tha Meta.
