Pas takimit të mbajtur pak më herët me kreun e PD-së, Lulzim Basha, Kreu i Shtetit Ilir Meta ka ndërmarrë hapin e radhës. Ai njofton se ka dorëzuar në Prokurorinë e Posaçme Antikorrupsion (SPAK), kallëzimin penal shtësë ndaj Ardian Dvoranit.
Presidenti Meta paralajmëron se fakte të reja pritet të dalin në dritë, edhe për persona të tjerë të implikuar në grushtin e shtetit. Sipas tij, ata nuk do munden t’i shmangen përgjegjësisë për konsumimin e veprave të rënda penale.
Qëndrimin e tij për një tentativë grusht shteti në Shqipëri, presidenti Meta ia shfaqi sot liderit demokrat, Lulzim Basha, të cilin e thërriti në një takim në zyrën e tij në Presidencë.
Meta quajti tentativë për grusht shteti lëvizjet e fundit të mazhorancës, sipas tij të organizuara, përmes miratimit të ligjit që i hoqi presidentit kompetencën e betimit për anëtarët e rinj të Gjykatës Kushtetuese.
Ja se çfarë shkruan Meta në Facebook:
Të dashur qytetarë,
Pasi u njoha me provat e reja tronditëse të angazhimit të tij në grushtin e shtetit, sapo kam firmosur shtesën në kallëzimin penal ndaj z.Ardian Dvorani.
Fakte të reja pritet të dalin në dritë edhe për persona të tjerë të implikuar në grushtin e shtetit, të cilët nuk do munden t’i shmangen përgjegjësisë për konsumimin e veprave të rënda penale.
Ju garantoj se GRUSHTI I SHTETIT DO SHPARTALLOHET NË MËNYRËN MË SHEMBULLORE!
