Presidenti Ilir Meta ka pritur sot kryeministrin e Kosovës, Ramush Haradinaj.
Meta uroi Haradinajn për krijimin e qeverisë së re të Kosovës si dhe për detyrën e rëndësishme si kryeministër i Kosovës.
Gjithashtu, Meta shprehu angazhimin e tij për bashkëpunimin e ngushtë me institucionet e Kosovës, në interes të rritjes së mëtejshme të njohjeve ndërkombëtare si edhe forcimit të perspektivës evropiane si dhe theksoi rëndësinë e intensifikimit të mëtejshëm të shkëmbimeve ekonomike, tregtare, shkencore, arsimore, turistike, kulturore etj. mes dy vendeve tona.
Presidenti Meta përshëndeti gatishmërinë e kryeministrit Haradinaj dhe qeverisë së re të Kosovës për vazhdimin e dialogut me Serbinë, si një proces pa alternativë dhe në funksion të paqes dhe stabilitetit të rajonit.
Kreu i shtetit nënvizoi rëndësinë e bashkëpunimit rajonal si një element kyç në promovimin e stabilitetit, sigurisë dhe paqes në gjithë rajonin, duke theksuar se Procesi i Berlinit është një mundësi e mirë për të rritur bashkëpunimin rajonal dhe përshpejtuar perspektivën tonë të përbashkët evropiane.
