Presidenti Ilir Meta ka folur rreth dekretimit të anëtares për Gjykatën Kushtetuese Marsida Xhaferllari.
Në fjalën e tij gjatë konferencës për mediat, Meta u shpreh se ai është korrekt me vendimin pasi Kushtetuta thotë se vakancën e plotëson Presidenti. Ai deklaron se i ka dhënë kohë Kuvendit për të plotësuar vakancën e dytë, por ata vepruan ndryshe. Meta i konsideron këto veprime të Kuvendit si ‘lojëra që bëhen për kapjen e gjykatës’.
“Unë jam shumë korrekt se Kushtetuta thotë se vakancën e plotëson Presidenti, të dytën parlamenti dhe të tretën gjykata e lartë dhe kështu përsëritet. Radhitja nuk është rastësi është për ruajtur balancat si krijohet gjykata Kushtetuese. Është e shprehur qartë se presidenti të bëjë dy emërime të njëpasnjëshme. Marrim rastin e gjykatës së Lartë, që është situatë specifike, që presidenti nuk ka përgjegjësi dhe të tjerët e kanë deklaruar se do të zhvillohet në një moment të dytë. Tani kemi katër vanakca dhe duhet të ruajtur ekuilibri mes institucioneve. KED ka bërë një proces janë pothuajse të njëjtët emra në listën e presidentit dhe parlamentit. Pra është e qartë, presidenti plotëson vakanën e parë dhe parlamenti të dytën, kjo logjikë do të ndiqej më pas, cdo gjë tjetër është një marrëzi e qartë për cdo njeri që ka dëshirë të lexojë kushtetutën.
Gjykata Kushtetuese është vendosur kusht nga e gjithë Europa, por sipas Kushtetutës dhe jo lojërave që bëhen për kapjen e gjykatës që janë mjaft evidente. Ditën e hënë u detyrova të bëj një postim që i kam thënë Kuvendit që përmbushni përgjegjësinë tuaj se unë e kam bërë time. Ju plotësoni tuajën dhe unë brenda 24 orëve do të plotësoj tjetrën që t’i jepja mundësi Kuvendit brenda afatit kushtetues të plotësonte vakancën e dytë. Ata vepruan ndryshe, kjo është përgjegjësi e tyre dhe jo e imja dhe unë jam i detyruar që të ndërmarr përgjegjësitë e mia”, tha ai.
