Presidenti Ilir Meta ka përshëndetur dorëheqjen e Haradinajt, ndërsa shprehet i bindur në pafajësinë e tij. Ai nënvizon ndër të tjera se nuk ka pabesi dhe presion që të thyejë burrin e shtetit dhe heroin e kombit.
“Krenar për Ramush Haradinajn dhe i bindur në pafajësinë e tij! Nuk ka pabesi dhe presion që e thyen Burrin e Shtetit dhe Heroin e Kombit!
Nga sot të gjithë duhet të flemë më pak, të shqetësohemi më shumë dhe të bashkohemi më fort që Kosova dhe rajoni ynë të jenë të pacënuar në paqen dhe sigurinë tonë, si dhe në të ardhmen evropiane”.
Kryeministri i Kosovës, Ramush Haradinaj, dha dorëheqjen e parevokueshme nga posti, pasi ka marrë një ftesë nga Gjykata Speciale në Hagë për tu intervistuar për periudhën e luftës në Kosovë.
Reagimet në mbështetje të Haradinajt kanë qenë të shumta, ndërsa në masë në rrjetet sociale ai është përshëndetur nga gjithë shqiptarët të cilët e quajnë Komandant.
