Duket se dueli mes Ramës e Metës sapo ka filluar. Komentet në distancë nuk kanë shërbyer aspak për uljen e gjakrave, përkundrazi. “Cicërimat” në rrjetet sociale ishin sinjalet e para të një përplasje mes presidentit dhe kryeministrit, për emrin e Ministrit të Jashtëm.
Por pas shantazhimeve në distancë, presidenti Meta ka zgjedhur që ti japë ‘shuplakën’ e radhës kryeministrit, duke e paralajmëruar se duhet të matet mirë. Qëndrimi i Metës është bërë publik me anë të një komenti në rrjetet sociale, duke u treguar i qartë se çdo veprim i Ramës s’duhet të kalojë cakun institucional.
“Ai që guxoi të kërcënojë komisar Zaganin pse denoncoi bashkëpunimin e trafikantëve të drogës me pushtetarët, ai që guxoi të kërcënojë nënkomisarin e Fushë-Krujës pse hetoi dhunimin e një vajze nga djali i një deputeti, ai që guxoi të kërcënojë një profesor të nderuar vetëm pse i shkruajti një letër Presidentit të Republikës në mbrojtje të interesit kombëtar, ai që kërcënon çdo ditë gazetarë e pronarë mediash.
Ai që kërcënon prokurorë e gjyqtarë, ai që kërcënon opozitarë dhe dëshmitarë, ai që urdhëron falsifikimin e letrave të tenderave e deri tek dokumente të sigurisë kombëtare bëri gabimin fatal të kërcënojë edhe Presidentin e Republikës së Shqipërisë, në mënyrë të drejtpërdrejtë.
Nuk ka fuqi në botë t’i bëjë presion e shantazh Presidentit të Republikës së Shqipërisë. Nuk ka Gjykatë Kushtetuese në botë që ndalon e interpreton kompetencat që i jep Kushtetuta e Republikës së Shqipërisë, Presidentit, për emërimin e shkarkimin e ministrave, e në veçanti të atyre që janë anëtarë të Këshillit të Sigurisë Kombëtare. Interesi kombëtar i pari! Shqipëria e Para!”, përfundon Meta.
