Kryetari i Partisë së Lirisë, Ilir Meta, ka komentuar nga Jala nisjen e hetimeve të SPAK ndaj tij. Ai paralajmëroi se përpara kemi një pranverë të hershme, duke iu referuar protestave qytetare kundër qeverisë së Ramës. Meta vendosi pikat mbi “i”, duke ia bërë të qartë Ramës se do menaxhojnë këtë dëshirë të madhe për ndryshim. “Problemi ynë është menaxhimi i padurimit të popullit shqiptar. Do menaxhojmë në mënyrën më të shkëlqyer këtë dëshirë të madhe për ndryshim”, tha Meta.
Ish-Presidenti i përcolli dhe një mesazh Ramës, duke i thënë se do dënohet me ligjet e veta, ndërsa shtoi se kreu i qeverisë është zemërlepur. Në të njëjtën kohë e ka paralajmëruar kryeministrin Rama që të heqë dorë nga raportet me bandat për të goditur opozitën, për të inskenuar krime politike.
“Mos më dil përballë me lepurusha e lepurushe, unë e kap demin për brirësh dhe e përplas përdhe si në të kaluarën.
Ti je një zemërlepur dhe hiq dorë nga raportet me bandat për të goditur opozitën, për të inskenuar krime politike. Ke bërë shumë dhe i ke dosjet plot. Do dënohesh me ligjet dhe firmat e tua”, tha Meta.
Dje, deputeti i Partisë së Lirisë Petrit Vasili akuzoi Prokurorinë e Posaçme. Reagimi i tij vjen pas bërjes publike të hetimit të kreut të Partisë së Lirisë Ilir Meta të nisur nga SPAK, pas kallëzimit të ish-deputetit Halit Valteri. Sipas Vasilit, SPAK është me pushime për inceneratorët dhe del në punë për gjeneralitetet e Ilir Metës, duke kujtuar shkresën që i ka dërguar Gjendjes Civile.
