Sikundër ishte paralajmëruar edhe më herët për një konferencë të jashtëzakondshme, Kreu i Shtetit Ilir Meta ka publikuar prova të reja per Ardian Dvoranin.
Presidenti Meta tha se ka fakte të reja të cilat do t’i dorëzojë në Prokurori për të thelluar më tej hetimet, në vijim të kallëzimit që ai ka bërë në nëntor, për kreun e Këshillit të Emërimeve në Drejtësi, Ardian Dvorani.
Në një konferencë për mediat, Meta tha se Dvorani qëllimisht e ka vonuar procesin e emërimeve të anëtarëve të Gjykatës Kushtetuese, për të siguruar sipas tij, mandatin e dytë në krye të KED-së.
“Fakte të reja mbi vepritarinë kriminale të Ardian Dvoranit”, tha Meta, teksa paraqiti faktet sipas tij, që flasin për një veprim të organizuar. Meta kërkoi që Dvoranit t’i ndërpritet detyra.
“Sot ju informoj juve dhe gjithë institucionet mbi faktet e reja për veprimtarinë kriminale të tij gjatë kryesimit të KED për 2019. Si dhe një shtesë në kallëzimin penal të depozituar për këtë shtetas, jo vetëm për të thelluar hetimin penal dhe pasojat e të cilave po i vuan ende sistemi i drejtësisë për mosplotësimin e kuorumit të Gjykatës Kushtetuese. Atij duhet ti ndalohet ushtrimi i veprimtarisë kriminale, me qëllimin e nxitur nga presioni politik për kapjen e Gjykatës Kushtetuese. T’i ndalohet veprimtaria e organizuar kriminale, për vonimin e plotësimit të Gjykatës, që vendin e fundit t’ja ruaj vetes”, tha Meta.
Me tej, Presidenti theksoi se “brenda ditës dhe brenda pak orëve, i përgjigjet kërkesës së kryetarit të Kuvendit, duke keqinformuar e fshehur informacion mbi vullnetin e shprehur të presidentit për ushtrimin e kompetencave të tij në emërimin e anëtarit të Gjykatës Kushtetuese, dhe kur në cilësinë e tij personale pa zhvilluar asnjë mbledhje të KED pa patur kompetencën ligjore të kryeje kompetenca të tija, konstaton si të jetë vetë presidenti zgjedhjen e një anëtari të GJK. I kallëzuari pa asnjë kompentencë e duke mashtruar opinionin vendas e ndërkombëtar, ka abuzuar që në bashkëpunim me Kuvendin ti rrëmbenin kompetencat Presidentit. Duhet ti përgjigjet SPAK pse nuk thirri mbledhjen e KED për shkresën e Presidentit. Me kë bashkëpunoi? Apo kush e urdhëroi që të përcillte në kohë rekord një përgjigje në shkelje të rëndë të çdo të drejte në përgjegjësinë e tij vetjake e të këshillit politik”.
