Presidenti Ilir Meta ka zhvilluar një vizitë shtetërore gjatë ditës së sotme në Kroaci. Kreu i Shtetit u prit nga homologia e tij kroate, Kolinda Grabar-Kitarović, e cila e nderoi Metën me titullin më të lartë të Republikës së Kroacisë, “Urdhri i Lartë i Mbretit Tomislav me Shirit dhe Yllin e Madh”.
Lajmin e ka bërë të ditur vetë presidenti Meta, i cili ka shpërndarë në Facebook një video nga momenti i marrjes së dekorimit.
Titulli jepet për kontributin dhe veprimtarinë e tij të spikatur në forcimin e marrëdhënieve midis dy vendeve dhe popujve tanë, dhe fqinjësisë së mirë midis vendeve të Ballkanit Perëndimor.
Postimi i plotë:
Shumë i nderuar për vlerësimin nga Presidentja kroate Kolinda Grabar-Kitarović, me “Urdhrin e Lartë të Mbretit Tomislav me Shirit dhe Yllin e Madh”.
Akordimi i Titullit më të lartë të Republikës së Kroacisë, më motivon për të punuar pa u lodhur për forcimin e mëtejshëm të marrëdhënieve të shkëlqyera historike e tradicionale mes dy vendeve e popujve tanë në të gjitha fushat.
Shqipëria dhe Kroacia, partnerë strategjikë, krah për krah në çdo sfidë!
