Referuar deklaratës së Kreut të Shtetit Ilir Meta për lumin e Vjosës, kreu i qeverisë Edi Rama ka zgjedhur që ti kundërpërgjigjet. Ai shprehet se Ministria e Mjedisit ka refuzuar zyrtarisht të japë leje për projekte HEC-esh në Vjosën e poshtme, që do të integrohet me Parkun.
Një ditë më parë, Presidenti Ilir Meta tha se Vjosa duhet të shpallet Park Kombëtar. Në fjalën e mbajtur në tryezën me temë “E ardhmja e Lumit Vjosa”, Kreu i Shtetit pohoi se mbështet iniciativën për ndalimin e ndërtimit të HEC-eve mbi lumin Vjosë.
Sipas Presidentit, raportet për ndikimin mjedisor të HEC-eve përgatiten në tavolina me papërgjegjshmëri të plotë, dhe në mënyrë të shpejtë.
Postimi i Ramës
“Qeveria jonë e ka shpallur Park Kombëtar Vjosën e lartme. Ministria jonë e Mjedisit ka refuzuar zyrtarisht të japë leje për projekte HEC-esh në Vjosën e poshtme që do të integrohet me Parkun! Vala shkatërruese e qeverisë së vjetër mbi lumenjtë në tërësi është zmbrapsur ka kohë!
Jam dakord me Ilir Metën që e ardhmja nuk është shkatërrimi, po sa mirë do kishte qenë sikur ta kishte mbrojtur Valbonën nga shkatërrimi kur ishte zv.shef i qeverisë së Saliut, siç mbron sot Vjosën nga rreziku imagjinar i hidrocentraleve që nuk do të ndërtohen!”, shkruan Rama në Twitter.
