Dy dekretet e kthyera pas nga presidenti Ilir Meta priten që të hidhen poshtë ditën e sotme gjatë seancës parlamentare.
Bëhet fjalë për ligjin për Rininë dhe për korporatën e investimeve shqiptare. Meta e ktheu ligjin për Rininë para disa ditësh, pasi sipas tij dy nene bien ndesh me parimet kushtetuese dhe krijojnë mundësinë e një varësie politike të drejtpërdrejtë të organizatave rinore. Gjë e cila sipas tij do të përbënte shtrembërim të vullnetit të të rinjve shqiptarë dhe cenim të vetë demokracisë.
Sa i përket kthimit të ligjit për korporatën e investimeve, Meta e argumentoi me faktin se nuk është i qartë dhe se shkel parimin e barazisë në ushtrimin e veprimtarisë ekonomike, cenon të drejtën e pronës si dhe shkel parimet kushtetuese.
Sipas kreut të shtetit, krijimi i një ligji të veçantë për krijimin e Korporatës është i panevojshëm.
