Kreu i LZHK-së, Dashamir Shehi, ka zbardhur tjera detaje në lidhje me takimin e mbajtur mëngjesin e sotëm mes opozitës jashtë parlamentare dhe presidentit Meta.
I ftuar në rubrikën “Opinion” në News24, Shehi deklaroi se Presidenti ka kërkuar që opozita të tërheqë disa nga kushtet që ajo ka vendosur për mbajtjen e zgjedhjeve.
Sipas tij, Meta është shprehur se zgjedhjet vendore dhe ato parlamentare nuk mund të bëhen në të njëjtën ditë. Ai shton se nisur nga situata ku ndodhet vendi, opozita mendon se zgjedhjet duhet të zhvillohen sa më parë.
“Nuk jemi të gjithë në unison tamam 100% për këtë punë, kemi të gjithë angazhimet tona, mendimet tona por do biem në konsensus e deri në fund të muajit do dorëzojmë një platformë dhe ne jemi gati të hyjmë në zgjedhje edhe të nesërmen në mëngjes me miratimin e saj. Të bëhen zgjedhjet sa më parë. Nëse zgjedhjet janë në 2021 unë them mos të nxitohemi.
Presidenti Meta mendon se ndoshta zgjedhjet të dyja bashkë në një ditë mund të mos bëhen, sugjeron që opozita duhet të tërhiqet nga disa kushte të veta por kjo është një tezë e presidentit që ne do e diskutojmë, nuk është se e refuzojmë por ne do e diskutojmë brenda kontekstit politik që ka vendi.
Dëshira e presidentit është që të bëhen zgjedhje të mira e të ndershme, por edhe opozita është dakord që Shqipërisë i është bërë kaq emergjente situata sa duhet të hyjë një ditë e më parë në zgjedhje.
Ndryshe këtu do vdesë pak nga pak edhe ajo pak demokraci që ka tepruar, por nuk ka tepruar se institucionet i kontrollon Rama por deri sa të vijë dita ta kuptojnë shqiptarët, sa ta kuptojnë ndërkombëtarët do jetë shumë vonë”, tha ai.
