Presidenti Meta, në një intervistë me gazetarin Lufti Dervishi, risolli në fokus krizën politike. Ai tha se mungesa e dialogut nuk është një zhvillim i ri. “Nuk është një zhvillim i ri mungesa e dialogut mes mazhorancës dhe opozitës, gjë që duhet të kishte dialog. Por sot ne kemi hapin ekstrem të opozitës, e cila në bllok dogji mandatet e saj dhe është jashtë Parlamentit që është institucion kryesor, më i rëndësishëm demokratik dhe përfaqësues i vendit”, tha Meta.
Po kështu, nisjen e krizës Meta e gjen që në vitin 2008. “Për mua është më e thellë, fillon që në ndryshimet Kushtetuese 2008. Ndryshimet Kushtetuse të 2008, më pas mënyra si u spostua Reforma në Drejtësi”, tha më tej ai.
Po kështu, presidenti Meta nënvizoi faktin se kemi bërë hapa pas për demokracinë. “Kemi bërë hapa mbrapa demokracisë parlamentare, është dëmtuar rëndë demokracia parlamentare, të listave të mbyllura, ku qytetarët votojnë për partinë dhe kryetarin e partisë”.
Meta dha mesazhe të qarta lidhur me këtë ngërç që ka kapluar palët politike, duke paralajmëruar se jemi në kohë për të shkuar drejt normalitetit. “Jemi në kohë për të mos shkuar drejt në konfrontimi. Nuk duhet të rrezikojmë arritjet e vendit, dhe duhet një reflektim për të kthyer vendin në normalitet”.
