Në një takim me të rinjtë e Partisë së Lirisë, Ilir Meta ka paralajmëruar se do i jepet “goditja në themel sistemit të ngritur nga kryeministri Edi Rama”. Meta u ndal edhe tek protesta e pedagogëve, të cilët kërkojnë rritjen e pagës. Ai tha me ironi se qeveria mjaft lehtë mund të plotësojë kërkesat e tyre, dhe kjo realizohet duke mos vjedhur. Në vazhdën e akuzave, Meta u shpreh se krimi po mbizotëron në vend dhe se Shqipëria është vendi i parë për numrin e të burgosurve në Evropë.
“Të rinjtë do të kenë zërin e tyre në Këshillin e Tiranës dhe këshillat e bashkive të tjera, gjysma e kandidatëve do të jenë të rinj e të reja. Kjo do i ndihmojë të përballojnë dhe shpenzimet e larta të jetesës.
Qeveria të plotësojë menjëherë kërkesat e pedagogëve, është e mundur. Kërkesat të drejta dhe të logjikshme, qoftë mjafton që qeveria të mos vjedhë më, ose të mos vjedhë kaq shumë. Është çështje prioritetesh.
Ju i dini aferat me të cilat vidhen shqiptarët, si ajo e inceneratorëve. Investime luksoze në kohë krize, kryeministri vetë nuk kursen. Maqedonia vendosi të mos marrë pjesë në Eurovision për të shkurtuar shpenzimet, dhe për tu solidarizuar me qytetarët.
Do i japim goditjen në themel këtij sistemi, që e ka bërë Rama dhe ministri i Brendshëm që thotë “nuk ka zhvillim pa krim”.
Krimi është një kancer për zhvillimin e një vendi. Shqipëria, vendi i parë për numrin e të burgosurve në Evropë. Ata që drejtojnë gjithë këto operacione, marrin lejet dhe paratë kanë mbështetjen e qeverisë. S’duam që të rinjtë të largohen, por të mbështeten nga shteti, qeveria dhe pushteti vendor që të çojmë vendim përpara. Do mbështesim të rinjtë”.
