Pas shumë muajsh zvarritje, sot do të mbahet seanca për shkarkimin e presidentit Meta nga detyra. Gjykata Kushtetuese do të vulosë sot fatin e Kreut të Shtetit, Ilir Meta.
Presidenti Ilir Meta ka konfirmuar se nuk do të jetë i pranishëm në seancën e sotme në Gjykatën Kushtetuese, ku do të vendoset nëse do të shkarkohet apo jo nga detyra. Me anë të një postimi në Facebook, Meta ka zbuluar se kush do ta përfaqësojë atë në seancën që pritet të nisë në orën 10:00.
“Bashkë me Landin duke përcjellë Bledin dhe Katrinën për në Gjykatë”, shkruan Meta. Bëhet fjalë për Këshilltarin Ligjor, Bledar Dervishaj dhe Drejtoreshën Juridike, Katrin Treska.
Në orën 10:00 nis seanca dhe secila palë ka në dispozicion 60 minuta të shprehet duke dhënë argumentet e saj. Në qershor të vitit që lamë pas, Kuvendi shkarkoi presidentin me argumentin se ai ka shkelur rëndë Kushtetutën, duke u përfshirë në zgjedhjet e 25 prillit.
Nga ana tjetër, Meta nuk ka qëndruar në heshtje. Pak ditë më parë, presidenti i është drejtuar me një shkresë kryetares së Gjykatës Kushtetuese ku i ankohet për mënyrën jo profesionale, sipas tij, që është sjell me të. Meta kërkoi t’i vihet në dispozicion procedura e ndjekur për çështjen e shkarkimit të tij, duke thënë se përgjigjet e mëparshme kanë qenë jo përmbajtësore.
