Ardian Dvorani është thirrur në orën 10:00, për tu paraqitur në Prokurori. Ai do të pyetet për padinë e ngritur nga Presidenti i Republikës, Ilir Meta.
Kreu i Shtetit e akuzon kreun e KED, se nuk ka zbatuar ligjin në renditjen dhe përcjelljen e listave së kandidatëve për anëtarë të Gjykatës Kushtetuese. Në kallëzimin e Presidentit të Republikës, nënvizohen dy akuza për Ardian Dvoranin, “Shpërdorim detyre” dhe “Përvetësimi i titullit apo i detyrës shtetërore” të parashikuar në nenet 248 dhe 246 te Kodit Penal.
Një ditë më parë, presidenti Meta dha dëshminë e tij në Prokurorinë e Tiranës për afro 50 minuta. Ai theksoi se shpreson që Prokuroria të mos jetë nën presione politike, dhe të bëjë punën e saj me profesionalizëm.
Pas këtyre deklaratave, Meta publikoi edhe videon e paralajmëruar, ku sipas tij, vërtetohet sesi u përdor Ardian Dvorani. Video e publikuar nga Meta është një spot shpjegues, përmbledhës, ku rendit procedurën dhe shkeljet që ka bërë Dvorani.
