Meta mbajti sot homazhe nderimi për liderin e Lëvizjes Studentore, Azem Hajdari, nga ku foli dhe për situatën aktuale në vend. Kryetari i Partisë së Lirisë, Ilir Meta, pohoi se nderimi për Azem Hajdarin ka një rëndësi të veçantë, pasi si asnjë herë tjetër në këto 32 vite janë vënë në diskutim arritjes e demokracisë, lirisë, të drejtave të njeriut, por edhe ekzistenca e kombit tonë.
“Është një detyrim për të qenë sot këtu dhe për të kujtuar liderin e lëvizjes studentore, frymëzuesin dhe guximtarin e jashtëzakonshëm për atë lidership aq frymëzues që tregoi në kohët më të errëta duke frymëzuar shpresë dhe besim në atë përmbysje që ndodhi falë protestës dhe qëndresës së studentëve. Por edhe qytetarëve të tjerë që rrëzuan edhe murin e Tiranës, sikurse ishte rrëzuar më parë ai i Berlinit.
Ky nderim për Azem Hajdarin ka një rëndësi të madhe, sepse si asnjë herë tjetër në këto 32 vite janë vënë në diskutim arritjes e demokracisë, lirisë, të drejtave të njeriut, por edhe ekzistenca e kombit tonë.
Mjafton të shikojmë sot në ditën e parë të shkollës numrin e nxënësve që janë regjistruar, për të kuptuar se kemi një kërcënim serioz për ekzistencën e kombit tonë, që vjen nga degradimi i vlerave të demokracisë.
Ndaj është shpirti i protestës ajo që do rivendosë demokracinë dhe të garantojë që sistemi i llogaridhënës të funksionojë për 200 vitet e ardhshme”, u shpreh Ilir Meta.
