Pak kohë më parë, presidenti Ilir Meta “shokoi” opinionin publik, sa që u bë dhe meme kur deklaroi se ishte gati të vetëvritej si ish- presidenti i Kilit, për të dalë nga kriza politika. Ai i befasoi të gjithë me qëndrimin e tij për zgjidhjen e krizës politike, ku tha se ishte gati të japte dorëheqjen si president, madje dhe të sakrifikonte jetën e tij si Salvador Allende, për të zgjidhur krizën.
Por sot Meta ka zgjedhur Durrësin për të dhënë një mesazh lidhur me situatën politike në vend, ndërsa ka kërkuar vendosjen e dialogut mes mazhorancës dhe qeverisë, teksa beson tek dialogu i përgjegjshëm. Nga Durrësi ku ishte i pranishëm në kuadër të 7 Prillit, ku përkujtoi 80-vjetorin e rezistencës antifashiste, ai kërkoi nga palët që të reflektojnë, duke treguar vullnet për dialog.
“7 Prilli vjen çdo vit dhe ne jemi në Durrës në këtë 80-vjetor, për të kujtuar me krenari të pafundme Mujo Ulqinakun dhe të gjithë ushtarakët dhe vullnetarët që i qëndruan betimit për atdhe dhe flamur dhe bënë krenarë çdo shqiptar njëherë e përgjithmonë. Vendosën vendin tonë në anën e duhur të historisë. Përkulem me nderim të jashtëzakonshëm.
Unë besoj te dialogu dhe zgjidhja politike përmes një dialogu të përgjegjshëm dhe real, për të rivendosur normalitetin e plotë, Kushtetues, institucional dhe demokratik.
Unë besoj që pas 1997, vendi ka bërë përparime të rëndësishme dhe i nxis politikanët e përgjegjshëm kudo që ndodhen në shumicë apo opozitë, të tregojnë që në këto 22 vite që Shqipëria ka bërë përparime dhe nuk mund të shkojnë dëm për hir të kokëfortësive dhe demonstrimeve të forcës, mitingjeve dhe anti-mitingjeve të panevojshme.
Aq më tepër, jemi në prag të sezonit turistik. Ka një hapësirë për të gjetur zgjidhet e duhura, dhe secili duhet të reflektojë.
Është detyrë e tyre të tregojnë vullnet për dialog, dhe të heqin dorë nga përdorimi i forcës dhe të udhëhiqen nga arsyeja”, u shpreh Meta.
