Kreu i Shtetit, Ilri Meta, ka qenë i ftuar dje në emisionin “Quo Vadis” në “Vizion Plus”, ku foli për aktualitetin politik. Presidenti Meta sulmoi liderin demokrat Basha, duke dalë hapur në krah të Sali Berishës. Ashtu si ish-kryeministri, edhe Meta e cilësoi Bashën si deputet dhe jo kryetar të PD-së. Nga ana tjetër ai foli sepse nuk thirri PD-në në konsultime për zgjedhjet vendore. Ai deklaroi se për të evituar çdo debat dhe polemikë me Partinë Demokratike, zgjodhi të takonte vetëm kreun e grupit parlamentar të PS-së, Taulant Ballën. “Për të evituar çdo debat dhe polemikë me PD-në, e cila bojkotoi zgjedhjet e fundit vendore, bëra zgjedhjen që në takim për zgjedhjet e 6 marsit të thërrisja kreun e grupit parlamentar të PS-së”, tha Meta.
Meta nuk la pa thumbuar kryedemokratin Lulzim Basha, teksa tha se është përpjekur ta ndihmojë duke i treguar të gjitha rrugët për ta shpëtuar nga rruga që ai ndoqi.
“Për z. Basha unë jam përpjekur t’i qendroj afër dhe ta ndihmoj duke i treguar të gjitha rrugët për ta shpëtuar nga rruga që ai ndoqi. Tani e kam të pamundur ta ndihmoj më, sepse e paralajmërova që me “orën”, me bojkotin e Reformës në Drejtesi, me çadrën, me djegien e mandateve, me zerimin e pushtetit vendor, me prishjen e marrëveshjes së 5 qershorit e shumë të tjera dhe ai nuk më dëgjoi.
Tani le të vazhdoje rrugën që ka zgjedhur. Lulzim Bashën, unë e kam kuptuar herët, për marrëdhënien armiqësore që ai ka me të vërtetën. Ai ka bërë të kundërtën e asaj që i kam kërkuar dhe që është e drejta, duke nisur që nga bojkoti i zgjedhjeve, çështja e Teatrit Kombëtar si dhe prishja e marrëveshjes së 5 qershorit, i cili mori udhëzimin për prishjen e kësaj marrëveshje. Gjithsesi unë jam i hapur ta pres në takim deputetin Basha”, u shpreh Meta.
Kreu i Shtetit dha sinjal se pasi të largohet nga Presidenca, do i bashkohet foltores së Berishës. Ai nënvizoi ndër të tjera se Berisha i di mirë rregullat e lojës. Ai sulmoi liderin demokrat Basha, duke dalë hapur në krah të Sali Berishës.
“Me Berishën ke dëshirë të bashkëpunosh, të luftosh, i njeh rregullat e lojës, një vlerësim që s’ka njeri që nuk e di. Mund të mos jem dakord për një veprim, një sjellje, por ai ka një raport të drejtë me interesin kombëtar. Baza e bashkëpunimit tim me cilindo është me popullin e 2 marsit, popullin e dinjitetit dhe demokracisë”, përfundoi Meta.
