Kreu i Shtetit, Ilir Meta, ka thënë dje në studion e “Të Paekspozuarit”, se do të angazhohet në betejë politike pas përfundimit të mandatit presidencial në 24 korrik 2022. Presidenti u shpreh se populli shqiptar ka nevojë për lidership të ri. Në të njëjtën kohë, ai sulmoi kryeministrin Edi Rama duke e quajtur “Gruaja e Bilalit”. Presidenti Ilir Meta, është pyetur edhe lidhur me zërat se pas largimit nga Presidenca, ai mund të shpallet “non grata” nga amerikanët. Presidenti Meta, me tone të ashpra u shpreh se atë nuk e shpall njeri të padëshiruar nga SHBA-ja.
“Populli shqiptar ka nevojë për lidership. Populli ka nevojë të marrë në dorë fatin e vetë, dhe të kërkojë llogaridhënie tek ata, që e drejtojnë atë. Pas 24 korrikut 2022 do angazhohem, për të vendosur themelet e Republikës!
Në shesh-betejë unë do të jem pas 24 korrikut, pavarësisht padurimit tuaj. Unë raportin e kam me popullin tim, dhe e kam të shkëlqyer. Mua “non grata” nuk më bën dot “Gruaja e Bilalit”. Unë raportin e kam vetëm me popullin shqiptar, dhe atij do t’i drejtohem pas 24 korrikut”, tha ai.
Meta la të nënkuptohet se nuk do e njohë vendimin e Gjykatës Kushtetuese, nëse kjo e fundit e shkarkon. “Presidenti ka qenë dhe mbetet gjithmonë në krye të detyrës. Sjellja e tij, qëndrimet e tij kanë qenë, janë dhe do të jenë deri më 24 korrik, të diktuara nga rrethanat në të cilat ai ushtron aktivitetin e tij gjithmonë në respekt të Kushtetutës së Republikës së Shqipërisë”, nënvizoi Meta.
