Dje u mbajt seanca e radhës në Kushtetuese, për shqyrtimin e vendimit të Kuvendit të Shqipërisë për shkarkimin e presidentit Meta. Pasi palët parashtruan argumentet e tyre, gjykata vendosi ta shtyjë për të hënën këtë seancë. Mbrëmjen e kaluar, i ftuar në emisionin “Frontline” në News 24, Meta është shprehur i bindur se pas 20 vitesh do të jetë sërish në krye të shtetit si President.
Kushtetuesja u mblodh dje për shqyrtimin e vendimit të Kuvendit të Shqipërisë, për shkarkimin e presidentit Ilir Meta. Të pranishëm në seancë përveç trupës gjykuese ishin përfaqësues nga media, Parlamenti dhe Presidenca. Kjo e fundit përfaqësohej nga drejtoresha Juridike, Katrin Treska dhe këshilltari ligjor i presidentit Ilir Meta, Bledar Dervishaj, i cili u paraqit për mbrojtje me një dosje voluminoze prej 140 faqesh. Dervishaj u shpreh se kreu i shtetit në asnjë akt të vetëm nuk ka shkelur Kushtetutën, ndërsa e konsideroi procesin e shkarkimit të Metës nga Kuvendi si hakmarrje. Madje këshilltari i presidentit theksoi se ngritja e Komisionit Hetimor nga Parlamenti në vitin 2019 konsiderohet shkelje, pasi ka ushtruar aktivitetin në kohën e zgjedhjeve, ndërkohë që shtoi se procesi i shkarkimit të Metës është i paligjshëm. “Kjo mënyrë veprimi, pa objekt dhe lëndë, dhe pa arritur të identifikojë veprim apo akt të rëndë. Kjo evidenton qartë se procesi është iniciuar politikisht, duke u hakmarrë ndaj presidentit, duke kufizuar rolin e tij dhe shmangur vëmendjen nga të gjitha problematikat. Nisma të tilla janë të papranueshme për shoqëritë demokratike. Konsiderohen kapje dhe puç institucional”, deklaroi Dervishaj.
INTERVISTA:
Pse kërkuat largimin e trupës gjykuese?
Meta: S’dua që të hyjë në çështje me persona të caktuar. Ka mundësi që të bëhemi serioz. Integriteti i secilit varet nga ligjet, Kushtetuta dhe s’dua të hyjë në këtë çështje. Nuk gjen dot një gjykatë që çështja merret dhe zgjidhet nga gjyqtari pa short. Në GjK tonë të re, çështja merret vetë, apo jepet nga dikush nuk e di. Por kjo është në kundërshtim me ligjin. Çdo gjykatë në Republikën e Shqipërisë e cakton çështjen me short, nuk di se në gjykatën më të lartë të ndodhë diçka e tillë. Ky Parlament duhet të shprehte vullnetin politik që opozita e kërparatave është zëvendësuar me shumë deputetë të tjerë kërpëratash. Ky nuk është problemi im, por ata duhet të ishin shprehur. Nuk më vjen keq sepse e di që pas 20 vitesh do ta bëj mandatin e dytë si president. Unë tani kam një rrugë të re, kisha plan tjetër, ndoshta të merrja një mandat të dytë, të bënim edhe disa ndryshime për të mbrojtur të drejtat.
Thellë- thellë do të dëshironi që mazhoranca t’ju shkarkonte përpara zgjedhjeve të 25 prillit?
Meta: Nuk kishte shanse dhe mundësi, jo Parlamentit apo mazhoranca që të më shkarkonte mua përpara 25 prillit.. Detyra ime ishte që ta çoja popullin shqiptar të tradhtuar nga klasa e vet politike.
