Meta kallëzoi penalisht ministren Gjonaj në Prokurorinë e Posaçme Anti-Korrupsion dhe zyrtarë të Ministrisë së Drejtësisë për shkelje të ligjit dhe Kushtetutës për botimet zyrtare. Pas këtij akti, Etilda Gjonaj ka një koment. Me një shënim në Twitter, Gjonaj shkruan se është e gatshme të përballet me SPAK, por edhe me vetë Kreun e Shtetit, Ilir Meta. Duke e konsideruar si mjaft absurde këtë histori, ministrja thekson se mbetet me rëndësi që Meta ka bërë hapin e duhur, njohjen e institucioneve të reja të Reformës në Drejtësi.
“Sikur të mos i mjaftonte politika e dëshpëruar e dhunës verbale, sot Kreu i Shtetit ka gjetur kohën të paraqitet personalisht me të gjithë stafin e tij në zyrën e sekretarisë të SPAK, për të dorëzuar një kallëzim penal ndaj meje dhe stafit tim. Pavarësisht absurditetit të kësaj historie, mbetet me rëndësi që Presidenti ka bërë hapin e duhur, njohjen e institucioneve e reja të Reformës në Drejtësi të cilën ai u lodh aq shumë duke e luftuar dhe përbaltur atë dhe cilindo që punon me të, shqiptarë dhe ndërkombëtarë. Shpresoj që të pranojë punën e tyre edhe ditën kur drejtësia e re dhe SPAK të filloj të godasë në shenjat e njohura botërisht si njolla të Shqipërisë, politikanë dhe zyrtarë të lartë të njohur për korrupsionin dhe krimet e tyre në këtë vend. Koha që drejtësia të veprojë!”, shkruan ajo.
