Kryetari i grupit parlamentar të Partisë Socialiste, Taulant Balla ka komentuar vendimin e presidentit Ilir Meta ndaj kreut të OSBE-së në Shqipëri, Bernd Borchardt.
Refuzimin e ftesës për takim nga ana e kreut të shtetit, Balla e quajti një veprim të turpshëm dhe degradim të Presidencës.
Sipas Ballës, ambasadori ofendoi disa banorë të “Unazës së Re” dhe jo kombin shqiptar. Ndërsa pretendon se kanë qenë banorët ata që e kanë provokuar dhe fyer.
“Është një prej ambasadorëve që ka një kohë të gjatë në Shqipëri, ka qenë në Shqipëri prej dy mandatesh. Dhe çdo person në jetën e tij private teksa dikush e fyen apo e shan, mund të ketë reaguar, dhe unë di që për këtë apo atë kontekst, unë nuk e di kontekstin. Jo shqiptarëve, disa banorëve që pasi e fyen përpara ata, ky ka reaguar.
Kjo është një çështje që nuk ka të bëjë me atë që unë po them. Nuk është e vërtetë që ambasadori Borchardt ka fyer shqiptarët si komb. Ai bën pjesë në ata ambasadorë që edhe kur ka qenë Sali Berisha dhe Ilir Meta në qeveri, edhe kur janë në opozitë mbetet një mbështetës i rrugës europiane të Shqipërisë në BE. Është një degradim i zyrës së Presidencës në aspektin politik. Është e turpshme që presidenti i republikës guxon të bëjë akte të tilla,” u shpreh Balla në studion e “News24”.
