Ish- ministri i Drejtësisë, Ylli Manjani ka gjetur “fajtorët” për situatën aktuale politike, ku pas dorëzimit të mandateve nga opozita, katër kandidatë kanë marrë mandatet, ndërsa pritet që numri të rritet pasi të tjerë kanë dorëzuar formularin e dekriminalizimit në KQZ.
Në një reagim në Facebook, Manjani shprehet se fajtorët janë pikërisht ata që i futën në lista këta emra, duke drejtuar gishtin nga Presidenti Ilir Meta e kryedemokrati Lulzim Basha. Ndërkohë që nga ana tjetër ai bën përgjegjës para Shqipërisë, Kryeministrin Edi Rama.
STATUSI I MANJANIT
Që të bëjmë dallimin:
Ata që i futën në lista këto emra që pranojnë të bëjnë lulet artificiale të këtij varrezë-parlamenti, kanë përgjegjësi të rêndë politike para partive dhe votuesve të tyre!
Pra e thënë më troç: Ilir Meta e Lulzim Basha janë përgjegjës para partive të tyre!
Ndërsa blerja që po ju bën pushteti për të krijuar demokraci fallco e bën këtë të fundit, pra pushtetin, përgjegjës para Shqipërisë dhe historisë së saj!
Që do të thotë: Edi Rama është përgjegjës para Shqipërisë!
Dallimi është i madh, për të gjithë ata që kanë të parë Shqipërinë dhe jo Partinë!
Nga ana tjetër, të gjithë bashkë i janë borxhli demokracisë, pa asnjë dyshim!
