Muajt e fundit kanë qenë mjaft të tensionuara mes presidentit Meta dhe kryeministrit Rama. Akuzat e kundër-akuzat kanë qënë të shpeshta. Por në këtë kohë pandemie, duket se gjakrat mes palëve janë shuar. Presidenti Meta i është bashkuar thirrjeve të mëhershme të kryeministrit Rama, lidhur me zbatimin me rigorozitet të masave ndaj koronavirusit.
Kreu i Shtetit vë në dukje se zbatimi i këtyre masave, është në të mirën tonë të përbashkët, për të mos pasur më humbje jete. Meta fton qytetarët që të mos abuzojnë, pasi pasojat do të jenë për komunitetin. E ndërsa personat të cilët preken fillimisht janë mjekët, të cilët po luftojnë pa reshtur për pacientët e infektuar.
Ai i përcjell një mesazh dhe kryeministrit Rama, teksa thekson se “Masat kufizuese duhet të jenë në përputhje me Kushtetutën e Republikës së Shqipërisë dhe të ligjeve në fuqi”.
Njoftimi
I ftoj të gjithë qytetarët të respektojnë me përpikmëri të gjitha udhëzimet dhe kufizimet e bëra publike për shkak të pandemisë globale COVID-19, pasi kjo është në interesin tonë të përbashkët.
Në këtë mënyrë jo vetëm mbrojmë shëndetin tonë, por ndihmojmë njëkohësisht mjekët dhe personelin shëndetësor, që po sakrifikon dhe rrezikon për shëndetin e të gjithëve ne.
Ndërkohë, është me rëndësi që çdo akt i Këshillit të Ministrave që miratohet në këtë situatë, t’i nënshtrohet paraprakisht një vlerësimi sa më të thelluar, në proporcion me gjendjen që dikton domosdoshmërisht miratimin e tyre.
Çdo masë e marrë duhet të jetë në përputhje me interesin e përgjithshëm publik dhe kombëtar, dhe në harmoni me hierarkinë e normave në fuqi, në mënyrë që miratimi i masave kufizuese të mos rrezikojë krijimin e konflikteve të reja sociale dhe gjyqësore.
Masat kufizuese duhet të jenë në përputhje me Kushtetutën e Republikës së Shqipërisë dhe të ligjeve në fuqi, por edhe t’i përgjigjen vetëm nevojës dhe urgjencës së përballimit të gjendjes së fatkeqësisë natyrore të shpallur nga Këshilli i Ministrave.
Bashkëpunimi më i ngushtë midis qytetarëve dhe institucioneve është garanci krysore për përballimin sa më efikas të kësaj pandemie për të gjithë.
