Kreu i Shtetit, Ilir Meta, ka nxjerrë dekretin ku në 6 mars në 6 Bashki të vendit do të zhvillohen zgjedhje të pjesshme vendore.
Në Shkodër, Dibër, Durrës, Vorë, Rrogozhinë dhe Lushnje, qytetarët do t’u drejtohen kutive të votimit për të zgjedhur kryebashkiakun. Dekreti për datën 6 mars të zgjedhjeve është nxjerrë sot nga presidenti Ilir Meta.
“Sapo dekretova caktimin e datës 6 mars 2022, për zhvillimin e zgjedhjeve të pjesshme vendore për kryetar Bashkie në Shkodër, Dibër, Durrës, Vorë, Rrogozhinë dhe Lushnje. Uroj që ky proces të jetë një shembull i besimit te demokracia dhe vota e lirë”, shkruan presidenti Ilir Meta në rrjetet sociale.
Dekreti i cili ka hyrë në fuqi, vjen një ditë pasi presidenti priti në një takim të kërkuar prej tij kreun e grupit parlamentar të PS-së, Taulant Balla, nga i cili, sikurse Meta u shpreh vetë, mori garancitë se shumica nuk do të bojkotojë këto zgjedhje.
Basha: Nuk do i shmangemi betejës
Kreu i PD-së Lulzim Basha, e ka bërë të qartë se demokratët do të dalin me kandidatët e tyre në zgjedhjet vendore. Lëvizja e presidentit për zgjedhjet e pjesshme është cilësuar si kurth ndaj Bashës, por për kreun demokrat, Partia Demokratike nuk do t’i shmanget asnjë beteje. “Partia Demokratike nuk do t’i ikë asnjë beteje, asgjë beteje përfshirë dhe zgjedhjet vendore. E dyta, faktori politik është një përcaktim i cili duhet të ndryshojë në këtë kulturë të re politike, që Partia Demokratike po prezanton në Shqipëri. Kjo që po ndodh nuk është thjesht një përplasje midis mendimeve krejtësisht të ndryshme për pluralizmin dhe demokracinë, është një ndryshim do të thosha kulturor i cili po ndodh për herë të dytë, para 31 vjetësh na çoi nga monizmi në pluralizëm. Por jo tamam në demokraci dhe tani synon që Shqipërinë ta kthejë në një vend normal Europian demokratik”, tha ai.
Meta konsultohet vetëm me PS
Dje, presidenti Meta pati një takim me kreun e Grupit Parlamentar të PS, Taulant Balla, për të diskutuar mbi datën e zgjedhjeve të pjesshme. Ajo që ra në sy është se në takim nuk pati konsultim me asnjë forcë tjetër politike, por vetëm me socialistët, dhe kjo shkaktoi shumë polemika.
Balla në fjalën e tij u shpreh se tradita prej kohësh është që konsultimi për zgjedhjet vendore bëhet gjithmonë me kryetarët e grupeve parlamentare. Nga ana tjetër, presidenti Ilir Meta në një prononcim për mediat u shpreh se nuk ka pasur asnjë ftesë zyrtare për konsultim për partitë politike, por ishte një kërkesë për sqarim me Ballën, për shkak të afateve ligjore.
