Presidenti Meta dekreton datën 25 prill 2021 për zhvillimin e zgjedhjeve. Kjo datë është vendosur dy ditë pasi ai zhvilloi një tur takimesh me të gjithë liderët politikë në zyrën e tij.
Kreu i Shtetit, ka nxjerrë sot dekretin e datës së zgjedhjeve, i cili hyn në fuqi në mënyrë të menjëhershme.
Përcaktimi i datës së zgjedhjeve të ardhshme parlamentare, u bë pas konsultimeve që zhvilloi me të gjitha palët politike.
Në këto takime, opozita kërkoi datën më të afërt që e lejon Kushtetuta, me argumentin që “Qeveria Rama duhet të largohet sa më parë”. Ndërsa kreu i qeverisë Edi Rama, i komunikoi presidentit Ilir Meta që të cakonte cilëndo datë, me përjashtim të 2 majit.
Dekreti:
PËR CAKTIMIN E DATËS SË ZGJEDHJEVE PËR KUVENDIN
Në mbështetje të nenit 65, pikat 1 dhe 2, 92 shkronja “gj” dhe 93 të Kushtetutës së Republikës së Shqipërisë, si dhe të nenit 8, 9, pikat 1 dhe 4 të ligjit nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar, si dhe pas konsultimit me partitë politike mbi caktimin e datës së zgjedhjeve për Kuvendin e Shqipërisë,
D e k r e t o j:
Neni 1
Zgjedhjet për Kuvendin të zhvillohen ditën e diel, më datë 25 prill 2021.
Neni 2
Ky dekret hyn në fuqi menjëherë.
Nr. Dekreti 11700
Tiranë, më 06.09.2020
PRESIDENTI I REPUBLIKËS
ILIR META
