Kryetari i Partisë së Lirisë, Ilir Meta, foli për kallëzimin penal ndaj anëtarëve të Autoritetit për Informimin mbi Dokumentet e Ish-Sigurimit të Shtetit. Në një konference për mediat, Meta u shpreh se Autoriteti i Dosjeve është kthyer në aneks të qeverisë dhe të Bashkisë së Tiranës. Ai thotë se për të gjitha shkeljet duhet të përgjigjen penalisht, pasi janë bërë pjesë e një manipulimi. Në kallëzimin drejtuar SPAK dhe Prokurorisë së Tiranës, kërkon që të bëhet hetim i plotë, objektiv dhe i pavarur brenda një afati sa më të shpejtë.
“Këtu nuk ka lidhje autoriteti i Dosjeve me mua. Kush e pengoi atë të më thërriste dhe të jepja sqarime?! Unë jam hetuar dy herë nga Komisionet e mëparshme dy herë, por ka bërë edhe një deklaratë që në rast se gënjej dhe nuk kam qenë bashkëpunëtor si e përcakton ligji, marr përsipër përgjegjësi penale. Autoriteti është aneks i qeverisë dhe Bashkisë së Tiranës.
Si mund të nxjerrësh të dhëna që janë sekret dhe i’a çon Kuvendit dhe pas tri ditësh i deklasifikon? Pra aty është vënë dorë! Ka pasur tre persona me iniciale I.M. Në regjistër na vinin emrin e babait, që mësuesit të mos na ngatërronin. Kush i kërkoi Autoritetit verifikimin e Ilir Metës? Çfarë urgjence kishte? Kishin bërë gati një projektligj si shpjegohet kjo, për të gjitha shkeljet duhet të përgjigjen penalisht sepse janë bërë pjesë e një manipulimi. Kanë tromaksur edhe kryetaren e Kuvendit, që nuk u tromaks kur falsifikuan edhe firmën e Gramoz Ruçit”, tha Meta.
