Javën e ardhshme pritet të finalizohen lëvizjet në kupolën e Policisë së Shtetit, pas shkarkimit nga detyra të Gledis Nanos. Në vend të tij pritet të emërohet Met Rrumbullaku, i cili merr drejtimin e policisë dhe largohet nga Agjencia e Mbikqyrjes Policore, ku pritet të emërohet Ardi Veliu.
Muhamet Rrumbullaku pritet që të veshë uniformën e Drejtorit të Përgjithshëm të Policisë së Shtetit. Burime të konfirmuara i thanë “Ora News” se ai ka bërë të gjitha dorëzimet e punës në zyrën e kreut të Agjesinse së Mbikqyrjës Policore, funksion të cilin e ka ushtruar deri tani.
Pas propozimit të Ministrit të Brendshëm, emërimi i tij zyrtar pritet të bëhet ditën e mërkurë e javës së ardhshme (7 gusht) në mbledhjen e qeverisë, e ndërsa të enjten është planifikuar prezantimi para vartësve të tij në drejtorinë qendrore të policisë.
Në vend të Rrumbullakut në drejtimin e Agjencisë së Mbikqyrjes Policore pritet të emërohet Ardi Veliu. Emri i tij thonë burimet jo zyrtare, është firmosur për të qenë titullar i strukturës së kontrollit të bredshëm i cili do të hetojë punonjësit e policisë.
Rikthimi i Veliut në Policinë e Shtetit vjen pas 1 viti shkëputje, ku pas largimit nga detyra e Drejtorit te Përgjithshmë ai mbajti postin e zv ministrit të Infrastrukturës.
Nga ana tjeter, Muhamet Rrumbullaku ishtë emri më i përfoluar në listën për Drejtor të Përgjithshëm. Më herët ai ka mbajtur detyra në drejtimin e departamenteve në Policinë e Shtetit, ndërkohë që ka qenë edhe drejtor i Policisë së Tiranës për disa vite. /Ora News
