Presidenti i Republikës, Ilir Meta në një intervistë për gazetarin Bejdo Malo në Fax News, ka thënë se po jetojmë një kohë të vështirë dhe duhet reflektim si nga ana e qytetarëve dhe nga ana e institucioneve përgjegjëse.
Meta u shpreh se këtë periudhë nuk ka qenë koha për tendera sekretë dhe për koncesione të reja por ka qenë koha për bashkëpunim, gjë që të cilën institucioni i Presidencës e ka ofruar gjatë fillimit të pandemisë, por që u hodh poshtë nga mazhoranca qeveritare me prishjen në mënyrë arbitrare të Teatrit Kombëtar.
Bejdo Malo: Kemi një shtet hermetik? Kemi një përpjekje të medias që gërmojnë dhe kërkojnë të informojnë publikun, por kemi dhe një paqartësi tek njerëzit dhe një mungesë transparence?
Ilir Meta: Ajo që është përgjegjësia që është pikërisht trajtimi me përgjegjësi maksimale e situatës, vendosja e prioriteteve, të cilat i shërbejnë përballimit të saj më të mirë, rishikimi i prioriteteve sepse prioriteti i saj është shëndeti, jeta e qytetarit, asistenca, ndihma e të sëmurëve dhe një pjesë e tyre për shkak të varfërisë dhe papunësisë nuk kanë mundësi të përballojnë as kostot e kurimit.
Natyrisht që në këto kohë, nuk është koha as për të bërë tendera sekret, as për të abuzuar me këtë emergjencë shëndetësore dhe aq më tepër për të dhënë koncesione të reja, sic për fat të keq ne shohim në flagrancë të plotë me interesin publik dhe qytetar.
Unë kam bërë cdo gjë për të rritur frymën e bashkëpunimit që kur u shfaq pandemia në muajin Mars e në vazhdimësi, për të përfshirë edhe opozitën, e cila nuk është në parlament dhe për të krijuar një situatë sa më konstruktive. Për fat të keq, kjo atmosferë u shkatërrua me vetëprishjen e shkatërrimin kriminal të Teatrit Kombëtar në një kohë kur vendi ishte në situatë të jashtëzakonshme.
Po ta vëmë re, nuk ka patur një vullnet për të trajtuar këtë krizë me profesionalizëm, për të rritur gjithmonë besimin e publikut tek autoritetet shtetërore dhe publike, por ka pasur shumë sjellje partizane të paqëndrueshme, në varësi të interesave afatshkurtra politike. Sidoqoftë, cdo reflektim do të ishte pozitiv, por e shoh pak të vështirë e të pamundur me këtë arrogancë që vjen nga uzurpimi i të gjitha pushteteve.
