Ish-deputetja e PDIU-së, Mesila Doda, është shprehur se zgjedhjet e parakohshme në Shqipëri, duhet të ishin mbajtur me kohë. E ftuar në studion e Report Tv, Doda tha se pas zhvillimit të zgjedhjeve të 30 qershorit, qeveria nuk jep më llogari te qytetari i thjeshtë por te krimi.
Sipas saj, problemi nuk qëndron te sistemi zgjedhor teksa shton se e vetmja mënyrë për zgjidhjen e krizës janë zgjedhjet e parakohshme.
“Zgjedhjet e parakohshme nuk janë ndonjë gjë të re, janë kërkuar nga Lulzim Basha që një vit më parë. Sot jemi në gjendje kur nuk e dimë se si do të ruhen pensionet dhe rrogat. Ky pushtet është i vjedhur, dhe nga ana tjetër pushteti është keqpërdorur, sepse janë vjedhur shumë në 4 vite, po largohen shumë e shumë shqiptarë.
Nuk e di se çfarë duhet të bëjmë, të marrim armët dhe të mbrojmë kutitë e votimit?!. Zgjedhjet janë vjedhur pa vajtur te kutia, sepse kanë shkuar te çdo shtëpi, u ka dhënë ryshfete, i kanë kërcënuar me policinë, i kanë kërcënuar me shkarkim nga puna. Është korruptuar sistemi. Janë të kota pretendimet se problemi qëndron te sistemi zgjedhor, ky sistem në këto kushte do të deformohet. Pas vjedhjes së zgjedhjeve, qeveria nuk jep llogari te qytetari, por te krimi. Që të punojë një sistem, duhet të punojë 3 të rinj për të garantuar pensionin e një të moshuari. Ndodhemi përballë një skenari, ku duhet të bëheshin zgjedhjet e parakohshme. Janë gjëra elementare, por këta duan të bëjnë arrogantin dhe injorantin. Dëgjova ambasadoren e re të SHBA-së për krizën politikë. Kjo krizë duhet të zgjidhet”, deklaroi Doda.
Ish-deputetja ka komentuar edhe refuzimin e negociatave me BE-në, teksa u shpreh se 9 kushtet e vendosura nga Gjermania, ishin një ‘PO’ në dukje, por në realitet ishte një përgjigje refuzuese për hapjen e negociatave.
“Gjendja dihej, nuk mund të hapeshin negociatat kur ka krizë poltike. Duhet të kishim plotësuar kushtet e Bundestagut, ishte një ‘po’ në dukje në realitet një ‘jo’. Aty kërkohet ngritja e reformës zgjedhore. Këtu nuk është problemi te sistemi elektoral, por te abuzimet me fondet, presionin e policisë. Edhe para 30 qershorit, u nënvizuan kushtet e Bundestagut.
Për Reformën Zgjedhore, opozita i ka bërë propozimet e veta, i keni transmetuar vërejtjet tona. Kemi dhe raportin e OSBE-ODIHR-it. Kjo është në vazhdën e autoritarizmit. E dimë arrogancën e tyre”, deklaroi ish-deputetja.
