Sekretarja e përgjithshme e PDIU-së, Mesila Doda, ka nxjerrë detaje lidhur me tryezën që mblodhi presidenti Meta sot. Sikundër ishte parashikuar, Kreu i Shtetit priti sot drejtuesit e opozitës së bashkuar, për të diskutuar rreth asaj që ai e konsideron si një “situatë të rëndë në vend”.
Zbardhet takimi i Metës me krerët e opozitës, paralajmërimet e Presidentit
Ajo zbuloi në emisionin “Top Talk”, se ka një komunikim të ndërmjetëm mes Ramës dhe Metës. “Mendoj që presidenti ka patur një korrespondencë të vazhdueshme. Dhe ka patur takime të vazhdueshme edhe me përfaqësues të mazhorancës. Mjafton t’ju them faktin për shembull, që kur fliste për lidhjet me kreun e opozitës dhe të mazhorancës, thoshte me atë kam folur. E kam thirrur për drekë, kurse me të opozitës, e mora në telefon. Pra që në këtë moment, mund të them; po mirë ky, pse nuk e trajton njësoj si opozitën edhe mazhorancën?!”, u shpreh Doda.
“Sigurisht që sot ai [Ilir Meta], është një njeri që është në mbrojtje të ligjeve dhe Kushtetutës së këtij vendi. Mos mendoni se nuk ka patur takim apo korrepondencë me njerëzit e mazhorancës. Sigurisht që ka patur, presidenti ka treguar gjithë letërkëmbimin që ka patur, të gjitha hapat që ka ndërmarrë që të mos mbërrihej këtu”.
Meta priti sot në një takim në Presidencë Lulzim Bashën dhe aleatët e tij. Takimi është fokusuar në dy çështje kryesore, zgjidhja e krizës politike, dhe zgjidhja e ngërçit me Gjykatën Kushtetuese.
“Manipulimi i procesit të emërimeve të anëtarëve të Gjykatës Kushtetuese, duke synuar kapjen e Gjykatës Kushtetuese përmes rrëmbimit të të drejtës kushtetuese të Presidentit të Republikës, për të bërë emërimet e tij, është skandali më flagrant i Reformës në Drejtësi dhe shkeljes së Kushtetutës. Presidenti theksoi se nuk do të lejojë askënd të neutralizojë kompetencat e Presidentit të Republikës, siç ia njeh Kushtetuta e vendit. Dhe se do të ndërmarrë çdo veprim për të ndaluar këtë puç kushtetues”, thuhet më tej, në një reagim zyrtar të Metës pas takimit.
