Presidenti i Francës, Emmanuel Macron ka dhënë një mesazh për Kosovën dhe Serbinë, në faqen e tij në Twitter.
“Mesazhi im nga Beogradi: Ne duhet së bashku të ndërtojmë paqen midis Serbisë dhe Kosovës”, ka shkruar Macron.
Macron ka qëndruar 2 ditë në Beograd për një vizitë zyrtare. Siç u raportua ditën e djeshme, presidenti francez, i ka thënë homologut të tij serb, Aleksandar Vuçiç, se Kosova dhe Serbia janë dy shtete evropiane.
“Serbia dhe Kosova janë shtete evropiane dhe ne duhet të ndihmojmë që kjo të bëhet fakt”, deklaroi Macron.
Po ashtu, gjatë ditës së djeshme, Macron tha se Evropa duhet ta mbështesë rinisjen e dialogut për normalizim marrëdhëniesh midis Kosovës dhe Serbisë, në mënyrë që të gjendet një zgjidhje konkrete në muajt e ardhshëm.
“Unë do të angazhohem personalisht për këtë, sepse besoj në Evropë”, tha Macron në konferencën për media.
