Dita e Verës në Tiranë nuk u festua në ditën zyrtare të saj, pra më datë 14 mars, por u shty për në datën 17 nga Bashkia për shkak të kushteve atmosferike. Ish-deputeti i PD-së, Luciano Boçi ka bërë një denoncim duke publikuar disa mesazhe, që sipas tij u janë dërguar mësuesve dhe nxënësve të Tiranës, të cilët kanë detyrim të marrin pjesë në festimet që organizohen sot në kryeqytet.
Sipas Boçit kjo është propagandë bajate që kërkon të stimulojë mesazhin e një Shqipërie fanar të lumturës dhe gëzimit.
“Nxënësit e mësuesit e shkollave të Tiranës urdhërohen të dalin të organizuar me kuadrate për ditën e verës së deformuar. Disa nga mesazhet e ardhura nga mësuesit, po jua sjell në foto. Propaganda bajate kërkon të stimulojë imazhin e një Shqipërie fanar lumturie e së cilës po i “plas gëzimi dhe e mira nga sytë”.
“Jetojmë e punojmë si në rrethim”; “Rroftë Shqipëria e lumtur Rilindase”; “Me partinë në ballë, përpara për fitore të reja”; Këto do jenë disa nga parrullat që do shpalosen sot në ditën e verës.
Por ndërrimi grotesk i kalendarit të ditës së verës nga 14 Mars në 17 Mars nuk është i padëgjuar. Ka ndodhur në Korenë e Veriut.
Korea e Veriut është në vitin 108, jo 2019, sepse vendi i shënon vitet sipas kalendarit Juche, i cili u prezantua në vitin 1997 dhe bazohet në datën e lindjes së Kim Il-sung: 15 prill 1912. Viti 1912 përdoret si Juche 1 dhe nuk ka Juche 0. Tiranën sot do ta ketë zili vetë Pheniani”, shkruan Boçi.
