Në seancën e djeshme plenare të zhvilluar në Kuvend, mediat kanë kapur bisedat nga celulari i deputetit demokrat Flamur Noka, që ka zhvilluar në “WhatsApp”. Nga fotoja e kapur nga biseda që është shpërndarë gjerësisht në media, tregohet qartë se deputeti demokrat Flamur Noka i kërkon kryetares së Kuvendit Lindita Nikolla që t’i japë edhe një herë fjalën ish-kryeministrit Sali Berisha në Kuvend për procedurë, e ndërsa i thotë se do ikin më pas nga seanca. “Edhe një herë Berisha për procedurë dhe ikim ne”, i shkruan Flamur Noka kryetares së Kuvendit Lindita Nikolla. Ndërkohë, deputeti Flamur Noka duket se ka folur edhe me ministrin e Drejtësisë Ulsi Manjën nga Partia Socialiste, por se për çfarë kjo nuk kuptohet qartë. Këto janë prova se deputetët pranë ish-kryeministrit Sali Berisha kanë komunikim me socialistët.
Alibeaj: Ramës i duhet një njeri si Sali Berisha, një njeri i izoluar nga SHBA-ja dhe BE-ja
Mesazhet në fjalë, nënkryetari i PD-së, Enkelejd Alibeaj i ka konsideruar si prova të bashkëpunimit të tij dhe Berishës me Edi Ramën. Sipas Alibeajt, ata nga njëra anë ndajnë pazare dhe koordinojnë luftën kundër PD, nga ana tjetër sulmojnë Bashën. Sipas tij, kjo tregon që Sali Berisha dhe kryeministri Edi Rama bashkëpunojnë ngushtë në biznese dhe në luftën kundër Partisë Demokratike.
“Që prej 9 shtatorit, Sali Berisha, për të hequr vëmendjen nga “non grata” e tij për korrupsion, ka nisur një fushatë të turpshme shpifjesh e mashtrimesh kundër lidershpit të PD-së. Ndërsa hedh mashtrime nga më ordineret, familjarët dhe bashkëpunëtorët e tij vazhdojnë të pasurohen duke bashkëpunuar me Edi Ramën dhe qeverinë e tij”, tha ai.
Ndër të tjera, Alibeaj u shpreh se Rama po bashkëpunon me Berishën, dhe kjo u vërtetua sipas tij edhe nga biseda e kapur në telefonin e Nokës. “Edi Ramës i duhet një njeri si Sali Berisha, ish-kryeministri i vetëm në Europë i shpallur “non grata” për korrupsion, një njeri i izoluar nga SHBA-ja dhe BE-ja. Prandaj Rama i ka vënë në dispozicion gjithë makinerinë e propagandës së tij duke bashkëpunuar më së miri me të, siç ndodh dhe në këtë komunikim të kapur nga mediat ku Flamur Noka bashkërendon me Ulsi Manjën dhe Lindita Nikollën. Rama dhe Berisha janë njësoj”, tha Alibeaj.
Noka i përgjigjet Alibeajt: Nuk bëj biseda për pallate te “5 Maji”
E menjëhershme ishte përgjigjja e Nokës pas deklaratës së Alibeajt. Sipas Nokës, shqiptarët e kanë parë se kush bën pazare, teksa thekson se ditët të vijim do të tregojnë edhe pse dështoi komisioni i inceneratorëve dhe kush përfitoi.
Postimi i plotë:
Shoqata e Bravave sot nepermjes pengut te Kapllan Pallateve te 5 Majit paska ciceruar kunder meje. Une kurre nuk kam bere e as bej biseda per pallate te 5 Maji a tjeterkund, dhe as per para inceneratoresh sic ben kreu i shoqates me zevendesen e tij, apo media qe ju ben fushate atyre. Une kam komunikuar me Kryetaren e kuvendit qe ti jepet fjala ish Kryeministrit Berisha. Sms e tregon qarte. Ulsiun ta pyesin se pse kam komunikuar. Nuk kam bere pazare qe te me fus ne pune gruan sic i ka kerkuar pengu i pallateve te 5 Majit . Flamur Noka i ka kerkuar te rrij larg pazareve Rama-Brava ne Diber. Jua thote vete ai pse debatuam. Se kush ben pazare shqiptaret e kane pare ne 17 Maj,..Milionat dhe karriket e ministrave nga Edi Rama i kane marre vetem kllounet e shoqates Basha – Bardhi ndersa Flamur Noka bashke me gjithe demokratet e vertete kane marre burgjet e regjimit, gazin lotsjelles dhe 6 pale zgjedhje te humbura si fature e pazareve Rama – Brava. Ditet ne vazhdim do tregojne se pse deshtoi komisioni i inceratoreve e kush perfitoi e cfare ndodhi ne pazarin Rama-Brava.
