Në ceremoninë e 77-vjetorit të Konferencës së Pezës, kreu i Shtetit, Ilir Meta, ka thumbuar lidhur me situatën politike në vend, duke e lidhur me shembullin që duhet marrë nga patriotët shqiptarë që dhanë jetën për lirinë e vendit. Referuar procesit zgjedhor të 30 qershorit, ai vuri theksin tek pluralizmi i Konferencës së Pezës, ku morën pjesë pa bindje politike, fetare, e ideje.
“Vimë të përkulemi me nderim në këtë vend të shenjtë për të gjithë shqiptarët, sepse Pezë për shqiptarët do të thotë bashkim, qëndrim, dhe besa-besë me parullën historike që lindi këtu dhe që nuk mund të mbetet vetëm histori, por që është edhe një amanet që gjithë shqiptarët të bashkohen për interesin kombëtar, pa dallim feje, ideje.
Peza u dogj, u masakrua si asnjë krahinë tjetër, por asnjëherë nuk u dorëzua. Përkulemi para veprës së patriotit të paharruar Myslym Peza. Në një kohë të errët të pushtimit ishte Konferenca e parë pluraliste në vendin tonë, e cila dha mesazhe të fuqishme të patriotizmit dhe të ngritjes mbi interesat parciale për interesin kombëtar.
Një ngjarje madhore që na fton të gjithëve të bashkëpunojmë sa më ngushtë, në respekt të ruajtjes së atyre vlerave e trashëgimie për ta investuar për edukimin patriotik të fëmijëve tanë. Ta kuptojnë të gjithë se sa ka arritur Shqipëria, përmes sakrificave sublime të paraardhëse tanë.
Peza nuk është vetëm histori, por është amaneti i gjithë dëshmorëve që dhanë jetën për të realizuar vendimin madhor të konferencës së Pezës. Sot objektivi ynë kombëtar është integrimi i Shqipërisë, është koha për të mos e vonuar më këtë proces për shkak të antagonizmit politik, por është koha për të forcuar bashkëpunimin duke lënë interesat afatshkurtra të ngushta në mënyrë që e ardhmja evropiane e Shqipërisë të jetë sa më pranë”, tha Meta.
Po kështu, gjatë ceremonisë ka qenë i pranishëm edhe zv.kryeministri Erion Braçe. Gjatë fjalës së tij para të ftuarve, Braçe me tone të larta ka folur për atë që quhet si shtrembërimi i historisë. Numri 2 i qeverisë, ka dërguar mesazhe të forta për ata të cilët deklarojnë se nuk pati luftë.
“Jemi mësuar të dëgjojmë se lufta nuk ishte dhe se nuk solli dëshmorë. Por lufta nuk është ndërtuar nga Kinostudio ‘Shqipëria e Re”. Por lufta ishte e vështirë, pati gjakderdhje. Gjatë kësaj lufte nuk bëmë asnjë gabim, populli shqiptar nuk gaboi, kur organizoi rezistencën.
Nuk gabuam kur erdhëm këtu në Pezë dhe i bëmë thirrje popullit shqiptar të bashkohen. Nuk gabuam kur krijuan Ushtrinë Nacional Çlirimtare, madje duke korrigjuar edhe ato akte të turpshme. Mos i harroni tradhtarët, as tradhtia nuk është e Kinostudios.
Qeveritë i shpallën luftë Anglisë, Francës dhe në dhjetor edhe SHBA, është i vetmi akt i turpshëm që politikanë kohë pas kohe kanë ndërmend dhe marrin ti shpallin luftë perëndimit. Ishte populli që e korrigjoi vendimin e atyre qeverive, ishin shqiptarët që u bënë palë me koalicionin më të madh Antifashist. Ishin shqiptarët, burra dhe gra, djem dhe vajza që i dhanë këtij vendi lirinë dhe pavarësinë”, tha Braçe.
