Nga Rrogozhina ku prezantoi kandidatin e koalicionit “Shtëpia e Lirisë” për bashkinë e këtij qyteti, Berisha akuzoi Bashën për përfshirje në dosjen “Toyota Yaris” të 3.4 milionë eurove që po hetohen nga autoritetet belge.
Ish-kryeministri ka zbuluar edhe se çfarë i thanë Bashës prokurorët belgë, pak ditë më parë, kur e morën në pyetje në ambientet e SPAK. Berisha i kujtoi Lulzim Bashës se hetuesit belgë kanë të drejtë ta hetojnë dhe arrestojnë, për shkak se Shqipëria është pjesë e konventës evropiane për të ofruar ndihmë juridike. Basha ka qëndruar rreth 90 minuta brenda godinës së SPAK, ku i është përgjigjur prokurorëve të Belgjikës, për të kryer hetime për dosjen “Toyota Yaris”. Pas përfundimit të dëshmisë, Basha u shpreh se hetimi për 3.4 milionë eurot nuk është mbyllur, por paratë janë të sekuestruara dhe çështja vijon të hetohet nga pala belge.
“Më duhet ti them ‘Mister Bravës’, bëj fotografi me cilin të duash, nxirr çdo foto me lekë dhe pa lekë, por dosja e Belgjikës, lidhja jote me organizatën kriminale do të dalë në dritën e diellit. Nuk ka forcë në botë që të pengojë hetimin belg. Kur doli pas dy orë hetimi në të cilën i dhanë dy gjëra; E para, u tha ky gënjen nën betim.
Në drejtësi po gënjeve, nën betim dënohesh. E dyta, i thanë merr ndonjë avokat se do i kesh ditët e vështira. Doli dhe tha; kam besim të madh tek njerëz të ndershëm të BKH dhe SPAK që kanë juridiksion të trajtojnë çdo problem. I thoshte palës belge me fjalë të tjera që ti nuk ke juridiksion të më hetosh mua.
Lul po ta them këtu; ata kanë juridiksion jo të të hetojnë, por edhe të të arrestojnë, edhe të të marrin me një jet privat (avion privat) e të çojnë në Bruksel sepse ka një konventë evropiane në të cilën Shqipëria është palë, ku ka firmosur dhe është e detyruar të ofrojë çdo ndihmë juridike që kërkojnë autoritetet e vendeve që kanë firmosur konventën. Prandaj leri ato, bëj be gjithë ditën për kokën e SPAK apo të BKH, sikundër po të paralajmëroj këtu Ferdinand se Luli yt do ketë dhe disa probleme të tjera të pa mbyllura shumë të rënda”, deklaroi ish-kryeministri Sali Berisha.
