Kancelarja gjermane, Angela Merkel ka bërë me dije se Bundesliga do të mund të rinisë në mesin e dytë të këtij muaji.
Merkel ka thënë “po” pasi është gjetur akordi mes presidentëve të landeve. Ajo paralajmëroi se nëse infektimet do të rriten, kufizimet do të rikthehen.
“Bundesliga do të rinisë të luajë në mesin e muajit maj. Nëse infektimet do të rriten, do të rikthehen kufizimet. Do të ketë një lloj karantine për të gjitha skuadrat, por nuk është e detyrueshme që të zgjasë dy javë”, tha ajo.
Mësohet se Federata gjermane ka nisur një mbledhje online me klubet, për të caktuar kohërat e rinisjes. Nuk dihet ende nëse do të niset me javën e 26-të, aty kur edhe u ndërpre kampionati.
“Kemi vendosur me arsye dhe kemi parë që masat e sigurisë janë të ashpra. Por lojtarët duhet t’u përmbahen rregullave, kush i paguan do të përballet me pasojat. Rregullat vlejnë për të gjithë, edhe për ata që marrin shumë para. Nuk mund të bëhet autogol siç ndodhi pak ditë më parë me lojtarin e Herthës”, tha presidenti i Bavarisë, Markus Soder, gjatë një konference për shtyp.
