Çështja e Butrintit është zhvendosur sot në Kuvend, ku ka pasur një përplasje mes Ministres së Kulturës, Elva Margariti dhe deputetet demokrate Ina Zhupa. Pas vendimit për dhënien e Butrintit me konçension, Zhupa denoncoi se aty do të ndërtohen bare, restorante e teatro. Sipas Zhupës, në Butrint do të jetë biznes fitimprurës për një fondacion, ndërsa Margariti i tha se ka një keqardhje për të. Në debat ndërhyri edhe kryeministri Rama.
Kryeministri Edi Rama nuk i ka kursyer ironitë për PD-në. Që në nisje të fjalës së tij, Rama tha se Butrinti u njoh në kohën e PD-së si pronë e një subjekti fizik. Teksa iu përgjigj akuzave te opozitës për Parkun e Butrinit, Rama sqaroi se investimi do të bëhet nga Fondacioni Shqiptaro-Amerikan, duke theksuar se nuk është mëkat që Butrinti do të ketë aktivitete fitimprurëse. Ai shtoi po ashtu se Parku i Butrintit do të jetë i pari që do të hyjë në hartën e parqeve me zero përqindje karboni.
“E dini kush është Fondacioni Shqiptaro-Amerikan? Është një kontributor i rëndësishëm në të gjithë procesin e zhvillimit të vendit me kohë e me vakt, dhe është një bashkëpunëtor i qeverisë, jo sot por i të gjitha qeverive të Shqipërisë prej kohësh.
Ju po akuzoni se Fondacioni Shqiptaro-Amerikan, kontribut i një grupi njerëzish që jetojnë në SHBA dhe mbledhin fonde për Shqipërinë, na paska hyrë në marrëveshje sekrete me qeverinë, për të hapur bare dhe restorante në Butrint sepse për ju bari dhe restoranti janë akoma e vetmja mënyrë si e shikoni ju fillimin e konvertimit të politikës në para. Sepse ju jeni autorët e kioskave. Jeni të njëjtët, nuk ndryshoni, nuk ka rëndësi fare se disa nga ju nuk kishit lindur kur u hapën kioskat. Kopeja juaj ka logjikën e vet, ju kioskën e keni në kokë.
Keni të gjithë moshën e atij të vdekurit që e dini për të gjallë. Parku i Butrinit sot, falë punës që kemi bërë ne, këtyre marrëveshjeve, prej vitesh ka vazhduar të qëndrojë në fuqi bashkëpunimi dhe ka vazhduar të ecë puna në Butrint, në saj të këtyre marrëveshjeve që kontribuojnë për këtë vend.
Butrinti patjetër që do ketë aktivitete fitimprurëse, ky nuk është mëkat, por ju duhet të shikoni se për çfarë do përdoren për Butrintin. Do përdoren për Butrintin. Parku do bëhet siç themi ne, ju flisni sa të doni. Ne dimë se çfarë bëjmë, ju nuk dini se çfarë flisni. Partneri ynë është Fondacioni Shqiptaro-Amerikan.
Ky Fondacion nuk jep kredi, nuk kërkon asgjë nga shteti shqiptar veç partneritetit. Ata investojnë dhe ne investojmë, së bashku siç kemi bërë në shumë projekte. Në Butrint po kalohet në modelin e administrimit të parqeve kombëtare në botën e zhvilluar. Qëllimi është që Butrinti të jetë Park Kombëtarë, që të vazhdojë të rrisë fuqinë atraktive. Të vijojë të zhvillohet në sensin e gërmimeve arkeologjike dhe ne jemi krenarë për këtë marrëveshje dhe shumë falenderues Fondacionit që ka marrë përsipër këtë investim, të kërkuar prej nesh.
Ne jemi shumë krenar për këtë marrëveshje, dhe falenderues që Fondacioni ka marrë përsipër të bëjë këtë investim. Fondacioni ka pranuar të hyjë në këtë proces dhe Butrinti do të jetë edhe e para zonë e cila do të hyjë në hartën e zonave, pa asnjë përqindje karboni, pra komplet zonë e gjelbër në sensin jo me pemë dhe shkurre, por me të gjitha aktivitetet e brendshme pa asnjë përqindje karboni. Për të gjitha këto, jemi shumë krenar”, tha Rama.
