Pak ditë më parë, në Tiranë, u vendos një memorial përkujtimorë për viktimat e mbetur më 16 korrik 2016, në grushtin e shtetit në Turqi. Mirëpo, ngritja e këtij memoriali ka ngjallur reagime të shumta.
Ky memorial, ka tërhequr edhe vëmendjen e shqiptaro-amerikanit Gjon Juncaj, i njohur si ish-Këshilltari Ligjor Kundër Korrupsionit në Ambasadën Amerikane në Tiranë, ekspert i OPDAT-it.
Teksa u drejtohet politikanëve shqiptarë, Juncaj shprehet se fillimisht duhet të ndërtonin një memorial për shqiptarët e vrarë në Kosovë nga trupat serbe, si dhe për shqiptarët e Malit të Zi që u vranë 100 vjet më parë nga ushtria e Mbretërisë së Serbisë dhe Malit të Zi.
“Të dashur politikanë të Tiranës, unë kam edhe dy përmendore për të shtuar në park ku përfshihen njerëz të vrarë jashtë Shqipërisë.
- Në vitet 1998-1999, mijëra burra, gra dhe fëmijë shqiptarë u vranë në tërë Kosovën. Emrat e tyre nuk janë renditur në parkun publik në Tiranë. Jam i sigurt që mijëra vizitorë kosovarë në Shqipëri çdo vit do ta vlerësonin këtë shenjë respekti.
- Në vitin 1919, 74 burra shqiptarë u morën nga shtëpitë e tyre malore në Hot dhe u ekzekutuan së bashku nga ushtria e Mbretërisë së Serbisë dhe Malit të Zi. Ata u hodhën së bashku në një varr masiv, ku mbeten edhe sot e kësaj dite, 100 vjet më vonë.
Një nga ata burra është gjyshi im i madh. Unë dhe anëtarët e tjerë të familjes shqiptare dëshirojnë të shohin emrat e tyre edhe në park. Ne do t’i donim këto përmendore në parkun e Tiranës sepse ne nuk besojmë se ato i përkasin një parku në Stamboll.
(Turqit do të pajtoheshin me ne për këtë) Ne nuk kemi lekë, euro, lira turke, apo ndikim politik për të paguar. Vetëm derdhja e gjakut shqiptar. Shpresojmë që kjo është një monedhë që do të pranoni gjithashtu”, shkruan Juncaj në rrjetet sociale.
