Zonja e Parë SHBA-së, Melania Trump ka shprehur shqetësimin e saj për politikën e migrimit që ndan familjet që ilegalisht hyjnë në SHBA.
Zëdhënësja e saj ka thënë për mediat e huaja se zonja Trump “urren kur sheh fëmijë të ndarë nga familjet e tyre” dhe dëshiron të shohë “reforma të suksesshme të imigrimit”.
“Znj Trump urren të shohë fëmijët e ndarë nga familjet e tyre dhe shpreson se të dyja anët e politikës mund të vijnë së bashku për të arritur reforma të suksesshme të emigracionit”, tha zëdhënësja e saj Stephanie Grisham për CNN.
“Ajo beson se ne duhet të jemi një vend që ndjek të gjitha ligjet, por edhe një vend që qeveris me zemër”.
Reagimi erdhi ndërsa qindra protestues u mblodhën jashtë ndërtesave në Teksas dhe New Jersey duke protestuar për ndarjen e rinjve emigrantë nga familjet e tyre dhe ndërkohëë që presidenti Trump është deklaruar për politikën “zero-tolerancë” për migrimin.
Për këtë çështje ka folur edhe ish-Zonja e Parë amerikane, Laura Bush, duke e cilësuar politikën në fjalë si të “pamoralshme”.
Në periudhën e fundit gjashtë-javore është raportuar për rreth 2,000 ndarje të familjeve për shkak të kalimit ilegal të kufirit.
Të rriturit që tentojnë të kalojnë kufirin, shumica prej të cilëve planifikojnë të kërkojnë azil, janë duke u përballur me vepra penale për hyrje ilegale në shtet.
