Gjykata e Lartë ka rrëzuar kërkesën e ish-ministrit Saimir Tahiri, për lirimin nga qelia. Gjykata rrëzoi kërkesën e ish-ministrit të Brendshëm Saimir Tahiri, i cili u dënua për “shpërdorim detyre”. Mësohet se gjykata ka refuzuar që t’i pezullojë dënimin me burg Tahirit, edhe pasi ish-ministri depozitoi një kërkesë në të cilën pretendonte se i rrezikohej jeta brenda qelisë. Trupi gjykues i përbërë nga Ilir Panda, Medi Bici dhe Sandër Simoni nuk e ka konsideruar të arsyeshme lirimin nga qelia të Tahirit.
Më 22 prill, ish-ministri i Brendshëm, Saimir Tahiri bëri kërkesë në Gjykatën e Posaçme për pezullimin e dënimit me burg. Në një kërkesë të ndarë në dy faqe, Tahiri pretendoi se vendimi i Gjykatës së Posaçme të Apelit është marrë në kundërshtim me ligjin dhe në kundërshti me interesat e tij. Ish-ministri shkruante se në burgun e Fierit, ku edhe vuan dënimin, është i rrezikuar nga subjektet e krimit.
Në Gjykatën e Lartë po shqyrtohet edhe një tjetër kërkesë e Tahirit. Ish-ministri kërkon pafajësi në GJL, pasi Apeli e dënoi me 5 vite burg për “shpërdorim detyre”. Ai përfitoi nga gjykimi i shkurtuar dhe përfundimisht u dënua me 3.4 vite burg.
NJOFTIMI
DATË 09 QERSHOR 2022
Nr.
RRETHI
NR. AKT
PALËT NDËRGJYQËSE
RELATORI
BAZA LIGJORE
U VENDOS
1.
GJ.K.K.O
9/2022
SAIMIR TAHIRI
Pezullim penal
M.BICI
Neni 476 KPP
Mospranimin e kërkesës së kërkuesit Saimir Tahiri, për pezullimin e ekzekutimit të vuajtjes së dënimit me burgim, dhënë me vendimin nr. 3 datë 04.02.2022, të Gjykatës së Posaçme të Apelit për Korrupsionin dhe Krimin e Organizuar.
