Djali i deputetit të ndjerë, Sokol Olldashi, Glauk Olldashi, ka komentuar situatën në Partinë Demokratike në përfundim të zgjedhjeve të 30 qershorit. Në dallim nga Basha, që e cilëson 30 qershorin si ditë feste, ai thotë se PD tanimë nuk ka asnjë pushtet.
Glauk Olldashi që në krye të statusit bën me dije se nuk ka votuar, ndonëse ishte një ditë të cilën e kishte pritur për të shprehur vullnetin e tij. Djali i një prej eksponentëve të lartë të Partisë Demokratike, teksa bën një analizë të situatës që ka degraduar, është i mendimit se tek zgjedhjet e 30 qershorit, nuk u testua besimi i popullit shqiptar.
Po kështu, Glauk ka edhe një as nën mëngë, se si mund të zgjidhet kjo situatë. “Për mendimin tim do na bënte mirë një proces zgjedhor, për ristrukturimin e partisë tonë”, shkruan ndër të tjera ai.
Statusi
“E Diela ishte dita në të cilën do të kisha ushtruar për herë të parë të drejtën e votës. Nuk e bëra, edhe pse e kisha pritur këtë ditë prej kohësh.
Demokratët nuk i janë trembur kurrë proceseve zgjedhore sepse ato janë për ne prova dhe sprova e demokracisë. PD-ja fiton zgjedhje vetëm kur ndjell besim dhe frymëzon demokratët dhe të gjithë shqiptarët që edhe pse nuk kanë bindje të caktuara politike besojnë tek fryma që forca jonë përfaqëson.
A është në popull ky besim? Zgjedhjet e 2015 dhe 2017 treguan që, Jo. Tek procesi i 2019 nuk e testuam besimin e popullit. Tashmë ky akt, i cili i dha 61 bashki PS – A do t’i vlejë kësaj force politike? Po për ne a do të vlejë?
Fakti i hidhur është që PD nuk do të menaxhojë më asnjë pushtet. Kush ka faj? Sigurisht që përgjigja që na vjen në mendje kur na pyesin është “vetja”. Por, demokratët nuk u pyetën për vendimin e mospjesëmarrjes, në fakt demokratët jo vetëm që nuk pyeten më në PD, por edhe kur ndonjëri guxon të kundërshtojë shpallët “tradhëtarë”. Kjo mendësi komuniste, edhe pse e huaj për partinë tonë, na ka “infektuar”.
Ç’farë është kura? Për mendimin tim do na bënte mirë një proces zgjedhor për ristrukturimin e partisë tonë.
P.S., Po më quajtët tradhtar……. nuk mërzitem.
