Në një bashkëbisedim me të rinjtë e FRESSH-it në kampingun e Jalës, Veliaj sulmoi haptazi Metën, teksa u shpreh se politika e mbrapshtë sabotoi projektin e Teatrit për 40 ditë. Ndër të tjera, kryebashkiaku tha se pavarësisht vonesës së vogël, puna për ndërtimin e Teatrit nuk do të ndalet.
https://tiranatoday.com/artistet-i-bejne-elozhe-veliaj-nis-fushaten-per-teatrin/
Pavarësisht këtij insistimi, Meta e ka pritur me mjaft qetësi qëndrimin e kryebashkiakut. Nga Pusteci, presidenti ia ka kthyer me të njëjtën monedhë Veliajt, në lidhje me akuzat e bëra prej kryebashkiakut të Tiranës, për kthimin mbrapsh të ligjit të Teatrit Kombëtar. Meta është shprehur se ata që kanë vërejtje për kthimin e ligjit për shembjen e Teatrit, duhet t’i referohen faqes zyrtare të Presidentit të Republikës.
“Nuk kam asnjë koment, përveç faktit se cilido që ka kontestime apo vërejtje për kthimin e ligjit, e ftoj që t’i referohet gjithmonë faqes zyrtare të Presidentit të Republikës, pasi jam i sigurt që argumentet, të cilat janë dhënë nga Institucioni i Presidentit, bazohen vetëm në Kushtetutën e Republikës së Shqipërisë, në marrëveshjet ndërkombëtare ku ne jemi palë dhe të cilat janë të detyrueshme për t’u zbatuar, dhe padyshim në të gjithë legjislacionin tonë në fuqi, dhe gjithmonë duke vënë në plan të parë interesin tonë kombëtar dhe publik”.
Edhe më herët, Erion Veliaj e ka cilësuar si një zhgënjim vendimin e presidentit Ilir Meta, për të kthyer ligjin për ndërtimin e Teatrit të ri në Tiranë. Ai shkruajti në Facebook se pavarësisht kësaj pengese nga presidenti, puna do të rifillojë në shtator, me miratimin e ligjit në Parlament dhe se Tirana do të ketë një Teatër të ri Kombëtar.
“Kthimi nga Presidenti i Ligjit që do t’i jepte Tiranës tonë një Teatër të Ri, modern, i projektuar nga një prej arkitektëve më në zë të gjeneratës sonë, ishte një zhgënjim! Jo sepse presidentët, në të kaluarën, nuk janë bërë palë me partitë politike për të kundërshtuar projekte si ai i Këndit të Lodrave te Liqeni, por sepse mendova se pas 3 vitesh progres në qytetin tonë, me një Shesh të Ri, një Bulevard të Ri, një Pazar të Ri e një Unazë të Re, e kishim tejkaluar kohën e sabotimeve të qytetit dhe se ishte krijuar pjekuria për të dalë mbi partitë e mbi familjet politike në vend”.
