Mjaft e revoltuar për situatën që ka precipituar, kryetarja e LSI-së, Monika Kryemadhi ka kërkuar nga shqiptarët që të bëhen bashkë në protestën e radhës. Ajo po kështu ka reaguar pas mesazhit që kryeministri Edi Rama i kishte dërguar Presidentit Ilir Meta, të cilin ky i fundit e bëri publik vetëm pak ditë më parë. Në mesazh, Rama i shkruante Metës se pas zgjedhjeve të 30 qershorit, Lulzim Basha nuk do të ishte më në krye të PD, dhe kur Meta të mbaronte mandatin e Presidentit, nuk do të gjente më gjurmë LSI-je.
Kryemadhi zbuloi se bashkëshorti i saj nuk e kishte vënë në dijeni, e për këtë i kishte mbetur hatri.
“Mua nuk ma kishte treguar Meta mesazhin, i thashë se më ngeli hatri që s’ma ka treguar. Unë i thashë që kur të mbarosh mandatin e Presidentit, të hyjmë të dy në garë dhe të shohim kush do të fitojë.
E çuditshme është si Rama kishte parashikuar si Basha nuk do ishte më kryetar i PD, dhe si do zhdukej LSI, kur çuditërisht LSI u shtua. Fallxhore unë, fallxhor Rama, por mua më dalin fjalët, kurse atij jo. Unë nuk them që 85% janë LSI e PD, se nuk ka shanse”, tha Kryemadhi.
