Studioja ligjore që përfaqësoi Mihal Kokëdhimën gjatë seancës për masën e sigurisë, që u zhvillua të dielën në Gjykatën e Shkallës së Parë në Vlorë, nuk do ta mbrojë më 51-vjeçarin. Ende nuk bëhen me dije shkaqet pse është ndërmarrë ky vendim, e ndërsa Kokëdhima do të përfaqësohet me tjetër avokat për çështjen e tij, që pritet të apelohet. Pas vendimit të dhënë nga Gjykata e Vlorës ditën e diel, duke vendosur masën “Arrest në burg”, avokatët e tij e quajtën të padrejtë vendimin.
Mihal Kokëdhima u prangos nga policia, pasi sulmoi dhe rrezikoi jetën e një grupi turistësh spanjollë, duke ju hedhur mbi kofanon e furgonit që ata kishin marrë me qira, dhe në tre kilometra rrugë në ecje i ka terrorizuar ata.
Vetë Mihal Kokëdhima ka pretenduar se ishin turistët që tentuan ta shtypnin me furgon, dhe se ai ju hodh automjetit për të shpëtuar. Ai ka deklaruar në seancën gjyqësore për masë sigurie, se vetëm donte t’i ndalonte ata, por është ndjerë i rrezikuar, pasi ata kanë dashur ta shtypin. Për këtë arsye, sipas 51-vjeçarit, ai është detyruar të hidhet mbi furgon.
“Nuk kam bërë asnjë gjë t’i sulmoja ata. U mundova t’i ndaloja. Ata nisën makinën, dhe desh më shtypën. Ju luta gjithë rrugës të ndalonin, por ata nuk ndaluan. Kur ndaluan zbrita nga makina, dhe shkova vetë lajmërova policinë dhe shkova në polici.
Më morën zvarrë me makinë. Ç’është kjo punë, nuk kam prekur njeri me dorë. Ku janë faktet që i preka me dorë? Më rrëzuan në Qeparo nga makina. Si ka mundësi, unë nuk e theva xhamin për t’i dëmtuar, por për tu mbajtur.
Unë u mora targën, telefonova policinë. Ata futën marshin të më shtypnin, dhe unë u hodha në kroskot. Kam dy fëmijë në shkollë në Gjermani. Ne vetëm dy muaj punojmë. Më lini të punoj”, tha Kokëdhima.
