Më 15 tetor, mbajtja e maskës do të bëhet me detyrim. Kryeministri Rama sërish ka apeluar që qytetarët të zbatojnë rregullat, në mënyrë që vendi mos të mbyllet sërish për shkak të COVID-19.
Por ndryshe nga kreu i qeverisë, mjeku i njohur Artan Koni, mendon se kjo masë nuk është e duhura.
Ai ka kritikuar vendimin e fundit të qeverisë për të mbajtur maskat kudo. Sipas tij, kjo është një masë pa asnjë lloj logjike, ndaj dhe do të haset rezistenca e njerëzve.
“Patjetër që kjo nuk është masa e duhur, por është e pritshme, pasi në Shqipëri vazhdojmë akoma me mentalitetin komunist, që masat merren me goditje të përqendruar si në zbor.
Iu themi njerëzve që do nxjerrim rregullin për maskat, por mund t’i anulojmë më vonë, siç anuloi edhe gjobat e vëna në karantinë.
Kjo është një masë pa asnjë lloj logjike, ndaj dhe do të haset rezistenca e njerëzve. Nuk mund të bëhet kjo me polici apo me gjoba. Ne jemi mësuar me këtë qeveri, ngrihet i pari i vendit në mëngjes, bën një VKM dhe kaq.
Patjetër që nuk do të zbatohet, jam i sigurt, ashtu siç nuk u zbatua karantina. Masat shtrënguese në karantinë u implementuan brenda Unazës së Vogël, jashtë saj, nëpër lagje, nuk kishte karantinë, as policë rrugëve që të mbikëqyrte.
Po flasim për Tiranën, s’po flasim fare se çfarë bëhet në qytetet e tjera. Nuk e mban dot shtetin në karantinë me dhunë. Mund të nxjerrësh ca ushtarakë me pushkë, për të bërë foto, por nuk e mban dot karantinën. E njëjta gjë do të ndodhë edhe me maskat, sepse njerëzve po iu sillet një rregull, që nuk e kuptojnë. Pastaj, unë e kam kaluar virusin, për çfarë duhet ta mbaj maskën?!”, u shpreh mjeku i njohur në një lidhje me “Skype” në News24.
